Каштачилик ва зардўзлик ўзбек амалий-безак санъати турлари орасида ўзининг қадимий анъаналарига эга бўлган ва асосан аёллар шуғулланиб келаётган санъат тури ҳисобланади. Ўзбек кашталарининг ноёблиги ва безак нақшларининг хилма-хиллиги эса ушбу санъатнинг бой анъаналаридан далолат беради.

Юртимизда ҳам миллий ҳунармандчилик анъаналарини давом эттираётган соҳа вакиллари кўплаб топилади. Ана шундай тикувчи аёлларимиздан бири Қашқадарё вилояти Нишон туманидаги "Каптарли" маҳалласида яшовчи Раъно Эшқувватовадир.  

Айни пайтда у гиламдўзлик билан бирга каштачилик, зардўзлик, қуроқчилик ва кўрпа-ёстиқ тикиш сирларини маҳалласидаги вақтинча ишсиз бўлган йигирмага яқин хотин-қизларга ўргатиб келмоқда.

<iframe width="650" height="420" src="https://www.youtube.com/embed/vqzm-MA3KAY" title="Каштачилик устаси: “Мақсадимиз ҳунарларимизда анъанани сақлаб қолиш”" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" allowfullscreen></iframe>

“Бизнинг асосий мақсадимиз ҳунарларимизда анъанани сақлаб қолиш”, -дейди у. –Биласизми, ҳар бир каштанинг безак мавзуси ва шаклу-шамойили у ёки бу буюмнинг вазифасига қараб белгиланади. Тикувчиликнинг тўн, дўппи, пешонабанд, белбоғ, қийиқча, нимча каби ўзбек анъанавий либослари, шунингдек, чимилдик, тахмонпўш, зинпўш, дайри, йўлпўш ва турли халтача каби буюмлари бугунги ҳаётимизнинг ажралмас қисмига айланмоқда.

Яқинда Нишон туман ҳокимлигининг мутасадди раҳбарлари "Каптарли" маҳалласида йўлга қўйилган ушбу устоз-шогирд анъанаси билан танишиб, у ердаги тикувчилик сирларини ўрганаётган аёллар билан учрашди.

Ўзаро суҳбат жараёнида масъуллар хотин-қизларнинг саволларига жавоб қайтараркан, келгусида уларнинг ўзи ҳам мустақил равишда ўз тадбиркорликларини бошлашлари учун амалий ёрдам беришларини таъкидлаб ўтишди.

Ў.Алимов тайёрлади.

ЎзА