Сўнги пайтларда ижтимоий тармоқларда қурилиши тугалланмаган уйларга тўлов қилиб, кейин эса на пулини ва на уйни ололмай юрган ҳамюртларимизнинг арзу доди тез-тез тарқалмоқда.

Тошкент шаҳар ҳокимлигининг огоҳлантиришича, «бизнесмен қурувчилар» шу даражага етиб келганки, ҳатто лойиҳа ҳудудий архитектура ва шаҳарсозлик кенгаши томонидан тасдиқланмаган ва экспертизадан ўтмаган «дом»ларни сотиш учун реклама кампанияларини бошлаб юборишмоқда.  

Гапнинг индаллосини айтсак, ана шундай «бизнесменлар» пойтахтнинг қоқ марказида, яъни Тошкент шаҳар, Тарас Шевченко кўчаси, 23-уй манзилида барпо этилиши режалаштирилган “DAhO кўп функцияли мажмуаси" бўйича реклама қилинаётган 5 та кўп квартирали уй лойиҳаси бўйича ҳудудий архитектура ва шаҳарсозлик кенгаши қарори олинмаган ва давлат экспертизасидан ўтказилмаган бўлса-да, қурувчи ташкилот хонадонлар сотувини жорий йил декабрь ойидан бошлаб юборган.  

Оз эмас, кўп эмас, нақ беш қаватли «дом»нинг сотувини қурилишни ҳужжатлаштирмай туриб бошлаб юборишган.  

Фуқаро аввало, янги қуриладиган уйлардан хонадон сотиб олишда таклиф этилаётган қурилиши режалаштирилган уй лойиҳаси ҳудудий архитектура ва шаҳарсозлик кенгашида кўриб чиқилиб, давлат экспертизасидан ўтказилганлиги тўғрисидаги ҳужжатлар билан танишиши лозим.  

Бу – лойиҳаси келишилмаган, давлат қурилиш экспертизасидан ўтказилмаган уйдан квартира сотиб олиб, муаммоларга дучор бўлмаслик учун зарур.  

Ҳатто қурилишнинг эгаси чет эллик нуфузли инвестор, дейишса ҳам, ҳушёр бўлиш лозим.  

Рекламалар қанчалик жимжимадор, ваъдалар қанчалик ёғли бўлмасин, ишончли жиҳатларини ҳисобга олиб турар жой танлаш зарур.   

Ш.Маматуропова, ЎзА