Тошкентнинг “Ҳумо” хоккей клуби икки йиллик танаффусдан сўнг яна халқаро турнирда иштирок этади, дея хабар бермоқда Спортни ривожлантириш вазирлиги матбуот хизмати.

Хабарда айтилишича, коронавирус пандемияси сабабли юзага келган икки йиллик танаффусдан сўнг, “Ҳумо” яна халқаро ўйинларда иштирок этади. Бу сафар Қозоғистоннинг Про-Лигасида.  

– “Ҳумо” муз майдонининг шиддатли баҳсларига қайтмоқда. Янги мавсумда клуб “Про хоккей лига”даги иштирокини бошлайди. Бу Ўзбекистон ва Қозоғистон хоккей мухлисларини хурсанд қилиши шубҳасиз. Қозоғистон чемпионатида маҳоратли жамоалар йиғилган. Ишончим комил, “Ҳумо”нинг турнирдаги иштироки мамлакатимизда хоккейнинг ривожига хизмат қилади, – дейди Ўзбекистон хоккей федерацияси биринчи вице-президенти Баҳодир Ғафуров. 

Айтиш лозим, қўшни мамлакатда ўтадиган ушбу лига баҳслари ўттиз биринчи марта ўтказилмоқда. Ўйинларга жорий йил 5 сентябрда старт берилади ҳамда келгуси йилнинг февралига қадар давом этади. Про-лига низомига биноан 1-8-ўринларни эгаллаган жамоалар плей-офф босқичига чиқади. Плей-офф баҳслари эса март ойида бошланиб, апрелнинг сўнгги кунларида якун топади. 

Эслатиб ўтамиз, Тошкентнинг “Ҳумо” клуби Қозоғистонда ўтадиган ушбу Про-лига баҳсларида 2019-2020 йилги мавсумда қатнашганди. Ўшанда вакилларимиз 10-ўриндан жой олган. 

Т.Рўзиев,  ЎзА