Туркия Президенти Режеп Таййип Эрдоған Россия етакчиси Владимир Путин билан Украинанинг Донецк, Луганск, Запорожье ва Херсон вилоятларида ўтказилган референдумларни муҳокама қилишини билдирди.

Икки давлат раҳбарининг телефон мулоқоти 29 сентябрда бўлиб ўтиши режаланган.

“Россия Президенти Путиннинг янги ҳудудларни аннекция қилиш борасидаги нияти жиддий”, деди Эрдоған.

Шунингдек, Туркия етакчиси мазкур тўрт ҳудуддаги референдумлар муаммо келтириб чиқариши мумкинлигини ҳам қўшимча қилди. “Бундай ишларнинг барини, эҳтимол, дипломатик йўл билан амалга оширса бўларди, 2014 йил Қримда ҳам худди шундай ҳолат кузатилган”, деди у.

“Жаноб Путинни биламан, агар у бир фикрга келса, шуни албатта амалга оширади”.

Эрдоған бу сўзларни “CNN Turk”га берган интервьюсида айтди.