2022 жылғы 17 мамырда Брюссельде «Еуропалық Одақ-Орталық Азия» жоғары деңгейдегі саяси және қауіпсіздік диалогының кезекті раунды өтті.

СІМ хабарлауынша, кездесуге Өзбекстаннан Сыртқы істер министрінің орынбасары Гайрат Фозилов бастаған делегация қатысты.

Қырғызстан, Қазақстан, Тәжікстан, Түркіменстан және Өзбекстан сыртқы істер министрлерінің орынбасарлары, сондай-ақ Еуропалық сыртқы әрекет қызметінің Бас хатшысының орынбасары және саяси директоры Энрике Мора қатысқан басқосуда тараптар кең ауқымды мәселелерді, соның ішінде Еуропалық Одақ пен Орталық Азиядағы соңғы оқиғаларды, ортақ қауіпсіздік мәселелерін, Ауғанстандағы жағдай бойынша ынтымақтастықты, сондай-ақ су ресурстарын, энергетиканы, шекараны басқаруды және сауданы жеңілдету мәселелерін талқылады.

Тараптар бейбітшілік, тұрақтылық пен өркендеудің маңызды факторы ретінде ЕО мен Орталық Азия арасындағы тығыз байланыстарды орнатуға бағытталған өзара іс-қимыл және тұрақты даму бойынша ЕО-Орталық Азия министрлер конференциясын Самарқандта өткізуге келісті.