Футбол бўйича Ўзбекистон чемпионати аёллар олий лигасида навбатдаги 10-тур ўйинлари бўлиб ўтди.

Жиззахнинг “Сўғдиёна-Women” аёллар жамоаси ўз майдонида Тошкентнинг “Пахтакор-Women” хотин-қизлар клубини қабул қилди.

Жиззах Футбол академияси стадионида Шерали Бобоқулов бош мураббийлигидаги майдонга чиққан “Сўғдиёна-W" пойтахтлик “пахтакорчи” дугоналарига ҳеч қандай имконият қолдирмади. Жиззахлик қизлар “Пахтакор-W”ни йирик ҳисобда мағлубиятга учратди.  

“Сўғдиёна-W” жамоасидан голларга чемпионатимиз тўпурари Диёрахон Ҳабибуллаева 6 марта (!), Дилдора Нозимова 5, Зарина Маматкаримова 2 ва Милана Ткач ҳамда Аделя Вилданова 1 мартадан муаллифлик қилган бўлса, “Пахтакор-W” футболчиси Розияхон Асқарова пенальтидан тўп киритиб 1 та жавоб қайтара олди, холос. “Сўғдиёна-W” – “Пахтакор-W” якуний ҳисоб – 15:1.  

Ўзбекистоннинг амалдаги чемпиони ва айни пайтда турнир жадвали якка пешқадами Қаршининг “Севинч-W” хотин-қизлари Фарғонада “Нефтчи-W”нинг меҳмони бўлиб, 0:12 ҳисобида ғалаба қозонди.

10-турнинг қолган баҳсларида қуйидаги натижалар қайд этилди: “Бухоро-W” (Бухоро) – “Металлург-W” (Бекобод) – 4:0, ОКМК-W (Олмалиқ) – “Қизилқум-W” (Навоий) – 3:1, “Локомотив-W” (Тошкент) – “Бунёдкор-W” (Тошкент) – 1:3.  

Ўтказилган 10 турдан сўнг, турнир жадвалини 30 имкониятдан 30 очко жамғарган Қаршининг “Севинч-W” хотин-қизлар клуби бошқариб бормоқда.

10 учрашувдан сўнг Жиззахнинг “Сўғдиёна-W” ҳамда Тошкентнинг “Бунёдкор-W” клублари 24 тадан очко жамғариб, 2 ва 3- поғонани эгаллаб турибди.

А.ҚАЮМОВ, ЎзА