Зеленский АҚШ вакиллари билан учрашувдан нимани кутмоқда? (+видео)
Украина президенти Володимир Зеленский сентябрь ойи охирига қадар АҚШ делегацияси билан яна бир бор учрашишини маълум қилди. Учрашувда озиқ-овқат ва энергетика хавфсизлиги масалалари муҳокама қилиниши кутилмоқда. Зеленскийнинг таъкидлашича, учрашув Нью-Йоркда бўлиб ўтадиган БМТ Бош Ассамблеяси доирасида ташкил қилиниши мумкин. Бу ҳақда DW хабар қилди.
Унда Зеленский Украина қишлоқ хўжалиги маҳсулотлари ва дон экспорти масаласини кўтармоқчи. У Украинадан дон ва бошқа қишлоқ хўжалиги маҳсулотларини Қора денгиз орқали олиб чиқишга Россия тўсқинлик қилаётганини айтди.
Унинг фикрича, Россия баъзан музокараларни бузиш ёки томонлар ўртасидаги мулоқотга халал бериш учун ҳужумларни кучайтиришга ҳаракат қилади. Лекин шундай бўлсада, Володимир Зеленский урушни тўхтатиш учун музокаралар ва мулоқотни давом эттириш керак, деб ҳисоблайди.
Шунингдек, Россия Украина энергетика инфратузилмасига ҳужум қилаётгани сабабли Киев АҚШ вакиллари билан ҳар куни алоқада бўлиб, энергетика хавфсизлиги масалаларини муҳокама қилаётганини билдирди. АҚШ ҳам Россиядаги сайловлар ва сайловолди жараёнлари тугаганидан кейин музокаралар қайта бошланишига умид қилмоқда.
АҚШ президенти Дональд Трамп Владимир Путин Украина билан урушни тугатиш бўйича келишувга тайёр эканини айтди. Шу билан бирга, Трамп Зеленский ҳам келишувга тайёр бўлиши кераклигини билдирди.
АҚШ Украина ва Россия ўртасида музокараларни бошлашга ёрдам бериш учун воситачилик ҳаракатларини яна тиклади. Трампнинг махсус вакили Стив Уиткофф ва Жаред Кушнер Москвага борганидан кейин Путин Трампга Европага нисбатан ҳеч қандай тажовузкор режалар йўқлигини маълум қилди.
Кенжа Бекжонов, Анвархўжа Аҳмедов, ЎзА
