Өзбекстандықтар АҚШ-қа ауыл шаруашылығы жұмыстарына тартылуы мүмкін
Өзбекстан мен АҚШ арасындағы еңбек миграциясы саласындағы ынтымақтастық жаңа кезеңге қадам басты. Енді өзбекстандықтар мұхиттың арғы бетінде заңды түрде, жоғары жалақы төленетін маусымдық жұмыстарға қатысу мүмкіндігіне ие болады.
Келіссөздер нәтижесінде Өзбекстанның Көші-қон агенттігі басшысы Беҳзод Мусаев пен АҚШ-тың беделді «USA Farm Labor» ұйымының жетекшісі Мануэль Фик арасында онлайн форматта маңызды келісімге қол жеткізілді. Құжат өзбекстандық кандидаттарды АҚШ-тағы маусымдық ауыл шаруашылығы жұмыстарына тартуды көздейді.
Аталған ұйым 22 жылдан бері H-2A бағдарламасы аясында қызмет етіп келеді және Солтүстік Америкадағы 1400-ден астам ірі фермерлік шаруашылықтар мен ранчолармен тығыз әріптестік орнатқан.
Келісімге сәйкес, жұмыс мерзімі 9–10 айды құрайды. Жұмысшыларға айына орта есеппен 3500 АҚШ доллары көлемінде жалақы төленеді. Сонымен қатар, барлық қызметкерлер жұмыс беруші есебінен тегін тұрғын үймен қамтамасыз етіледі.
Іріктеу барысында ауыл шаруашылығы саласында тәжірибесі бар білікті мамандарға басымдық берілетіні ерекше атап өтілді.
Кездесу қорытындысында тараптар ынтымақтастықтың келесі кезеңдерін қысқа мерзім ішінде жүзеге асырып, процестерді жеделдетуге уағдаласты.
