Ёшларнинг инновацион лойиҳалари кўриб чиқилди
Ўзбекистон Республикаси Бош вазирининг биринчи ўринбосари – таълим ва илм-фан вазири Эркинжон Турдимов Ёшларнинг инновацион ташаббусларини қўллаб-қувватлаш офиси ҳамда "INNO" инновацион ўқув-ишлаб чиқариш технопарки фаолияти билан танишди.
Ташриф давомида Бош вазирнинг биринчи ўринбосарига ёшларнинг инновацион ғояларини қўллаб-қувватлаш, стартап лойиҳаларини ривожлантириш, замонавий технологияларни амалиётга жорий этиш ҳамда ёшларнинг илмий-техник салоҳиятини ошириш борасида амалга оширилаётган ишлар тақдим этилди.
Шунингдек, ёшларнинг истиқболли стартап лойиҳалари, уларнинг янги ғоя ва ишланмаларини молиялаштириш ҳамда амалиётга татбиқ этиш механизмлари атрофлича ўрганилди. Технопаркда яратилган замонавий инфратузилма, илғор лабораториялар ва ишлаб чиқариш майдонларининг имкониятлари муҳокама қилинди.
Мулоқот чоғида ёш авлоднинг илмий-техник салоҳиятини ошириш, уларни юқори технологиялар соҳасига янада кенг жалб этиш ҳамда фан ва ишлаб чиқариш ўртасидаги интеграцияни мустаҳкамлаш устувор вазифа экани алоҳида таъкидланди.
Шу билан бирга, ёшларнинг инновацион фаоллигини ошириш ва уларнинг янги ғояларини қўллаб-қувватлаш орқали мамлакат иқтисодиётининг турли тармоқларида замонавий ечимларни жорий этиш муҳим аҳамият касб этиши қайд этилди.
Ташриф давомида ёшлар учун яратилган имкониятлардан самарали фойдаланиш, уларнинг илмий изланишларини рағбатлантириш ва амалий натижаларга йўналтириш масалаларига алоҳида эътибор қаратилди.
Инновацион лойиҳаларни ишлаб чиқишда ёшларнинг ташаббускорлиги, мустақил фикрлаши ва замонавий билимларни эгаллаши муҳим омиллардан бири экани таъкидланди.
Шунингдек, стартап ташаббусларини қўллаб-қувватлашда молиявий кўмак, маслаҳат хизматлари ва мутахассислар билан ҳамкорлик имкониятларини кенгайтириш зарурлиги қайд этилди.
Технопарк фаолияти ёшларнинг назарий билимларини амалиёт билан уйғунлаштириш, янги технологияларни синовдан ўтказиш ва истиқболли ишланмаларни ишлаб чиқаришга йўналтиришда муҳим ўрин тутиши таъкидланди.
Бундан ташқари, таълим муассасалари, илмий-тадқиқот ташкилотлари ва ишлаб чиқариш корхоналари ўртасидаги ҳамкорликни ривожлантириш орқали инновацион муҳитни янада мустаҳкамлаш масалалари кўриб чиқилди.
Ёшларнинг рақамли технологиялар, муҳандислик, робототехника ва бошқа истиқболли йўналишларга қизиқишини ошириш, уларнинг амалий кўникмаларини ривожлантириш муҳим вазифалардан бири сифатида белгиланди.
Учрашувда истиқболли лойиҳаларни саралаш, уларни ривожлантириш ва бозорга олиб чиқиш жараёнларида тизимли ёндашувни кучайтириш зарурлигига эътибор қаратилди.
Эътироф этилганидек, ёшларнинг инновацион ғояларини қўллаб-қувватлаш нафақат янги ишланмалар яратиш, балки янги иш ўринларини ташкил этиш ва юқори қўшилган қийматга эга маҳсулотлар ишлаб чиқариш учун ҳам кенг имкониятлар яратади.
Ташриф якунида ёшларнинг илмий ва инновацион салоҳиятини рўёбга чиқариш, уларнинг истиқболли ташаббусларини амалий натижаларга айлантириш ҳамда инновацион инфратузилма имкониятларидан самарали фойдаланиш муҳим аҳамиятга эга экани таъкидланди.
Назокат Усмонова,
ЎзА мухбири
