“Янги Ўзбекистон” университетида СИ ва фанлар бўйича халқаро олимлар жамланди
Ўзбекистон ва Корея ҳамкорлигида сунъий интеллект ҳамда фундаментал фанлар кесишмасидаги халқаро анжуман дунё олимларини бирлаштирди. Бу ерда келажак илмини шакллантирувчи сўнгги тадқиқотлар муҳокама қилинди.
“Янги Ўзбекистон” университети ҳамда Корея Республикасининг Соонгсил университети ҳамкорлигида нуфузли халқаро илмий анжуман ташкил этилди. Унда Ўзбекистон, Корея Республикаси ва Хитойдан етакчи олимлар ҳамда илмий тадқиқотчилар сунъий интеллект (СИ), математика, статистика, кимё ва бошқа турдош фанлар бўйича сўнгги илмий ишланмаларни муҳокама қилиш учун жам бўлди.
Анжуманнинг очилиш маросимида “Янги Ўзбекистон” университети ректори Баҳодир Аҳмедов, Корея Республикасининг Ўзбекистондаги Фавқулодда ва мухтор элчиси Вон До Ён, Соонгсил университети вице-президенти Жанг Кёнг Нам ҳамда ушбу университетнинг Табиий фанлар коллежи декани Канг Викёнг иштирок этди.
Анжуман дастури замонавий сунъий интеллект тадқиқотларининг кўп тармоқли моҳиятини акс эттирди. Маърузаларда Омикс маълумотлари учун чуқур ўргатишга асосланган йўллар таҳлили, Жордан алгебралари ва органоид тасвирлар таҳлили, кўп белгили ҳамда транс-этник полигеник хавф шкаласи моделлари каби долзарб мавзулар қамраб олинди. Ушбу илмий платформа олимлар учун ўз тадқиқотларини тақдим этиш, тажриба алмашиш ҳамда олий таълим муассасалари ва давлатлар ўртасидаги илмий ҳамкорликни мустаҳкамлаш учун муҳим имконият яратди.
Тадбир сунъий интеллектнинг математик назария, статистик усуллар, ҳисоблаш ёндашувлари ва табиий фанлардаги амалиётни боғловчи фанлараро соҳа сифатидаги ўсиб бораётган ўрнини яққол намоён этди.
Семинарнинг иккинчи кунида Одамар фазоларида статистика ҳамда граф сигналлари учун ўлчамни камайтириш усуллари каби мавзулар кўриб чиқилиб, замонавий СИ асосидаги чуқур математик ва статистик пойдевор намойиш этилади.
Анжуманнинг якуний куни соф математик тадқиқотларда сунъий интеллектнинг ўрнига бағишланган махсус сессия билан давом этади. Унда “Янги Ўзбекистон” университети олимлари мураккаб математик мавзулардаги тақдимотлари билан чиқиш қилади.
Семинар 4 октябрга қадар давом этади.
Санжар Тошпўлатов,
ЎзА
