“U-ENTER” Инновация марказида Ўзбекистонда илк бор “USOLVE” стартапларни қўллаб-қувватлаш дастурининг расмий ишга туширилиши бўйича тадбир бўлиб ўтди. 2026 йилда Ўзбекистонда амалга ошириладиган “Virtual Accelerate” дастурларининг тақдимоти ҳам ўтказилди. Бу дастур стартаплар ва бизнесларни тезкор ривожлантиришга қаратилган халқаро бизнес-хизматлар платформаси ҳисобланади.

Мазкур ташаббус Буюк Британия ҳукумати билан ҳамкорликда молиялаштирилаётган “Марказий Осиёда инклюзив яшил ривожланиш бўйича Буюк Британия дастури” доирасида амалга оширилмоқда.

Тақдимот маросимида давлат органлари, халқаро ташкилотлар, хусусий сектор, венчур фондлари, тадбиркор аёллар, бизнес-инкубаторлар ва акселераторлар, шунингдек стартаплар ва экотизимнинг бошқа вакиллари иштирок этди.  

“USOLVE” дастури инновацион, технологик ва инклюзив ечимлар яратишга интилаётган стартапларни қўллаб-қувватлашга йўналтирилган бўлиб, унинг мақсади барқарор иқтисодий ўсишга хизмат қилувчи янги авлод лойиҳаларини шакллантиришдир. Тадбир давомида иштирокчиларга дастурнинг асосий босқичлари тақдим этилди: аризаларнинг дастлабки саралаш тартиби, ғояларни такомиллаштириш ва уларни синовдан ўтказиш, шунингдек энг истиқболли 50 та стартап жамоаси учун инкубация дастури.

 - “U-ENTER” Инновация марказида Буюк Британия ҳукумати ва “Virtual Accelerate” билан ҳамкорликда “USOLVE” стартапларни қўллаб-қувватлаш дастури ишга туширилди, - дейди “U-ENTER” Инновация маркази директори ўринбосари Илҳомжон Алиев. – Ушбу дастурнинг асосий мақсади ёшлар стартапларини, аёллар томонидан амалга ошириладиган стартапларни, хусусан, АйТи, инклюзив тадбиркорлик йўналишида қўллаб-қувватлашдан иборат. Дастур хакатон, бизнес-инкубация модулларини ўз ичига олади ва бутун Ўзбекистон бўйлаб амалга оширилади.      

Инкубация жараёни интенсив ўқув модуллари, индивидуал ва гуруҳ менторлиги, маҳсулотни ривожлантириш, бизнес-моделлаштириш, ҳамкорликлар яратиш ва инвесторлар билан алоқаларни йўлга қўйиш бўйича амалий кўмакни ўз ичига олади. Дастур якунида Demo Day ташкил этилиб, унда иштирокчи жамоалар ўз ечимларини экспертлар ва венчур инвесторлар олдида тақдим этади.

Шунингдек, энг кучли 10 та стартап 2026 йилда Остонада бўлиб ўтадиган GITEX тадбирида иштирок этиш имкониятини қўлга киритади. Минтақанинг йирик технологик воқеаларидан бири бўлган ушбу майдон илмий-техник янгиликлар, халқаро бозорлар ва янги инвестиция имкониятларига кенг йўл очиб беради.

<iframe width="650" height="420" src="https://www.youtube.com/embed/EvXx12_0Fsc" title="“USOLVE” O‘zbekistonda startaplarni qo‘llab-quvvatlaydi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

 Санжар Тошпўлатов, Дониёр Якубов, Улуғбек Тўхтаев, ЎзА