Триатлон бўйича жаҳон чемпионати ғолиблари аниқланди
Самарқанддаги ўтказилаётган триатлон бўйича жаҳон чемпионати (World Triathlon Championship Series – 2026) ғолиблари аниқланди.
Марказий Осиё давлатлари орасида илк бор мамлакатимизда ўтказилган нуфузли мусобақада 28 давлатдан 100 нафардан ортиқ маҳоратли спортчилар иштирок этди.
43 нафар атлет қатнашган “World Triathlon Championship Series – 2026”нинг аёллар ўртасидаги беллашувида Буюк британиялик Бетҳ Поттер биринчи ўринни қўлга киритди. Иккинчи ўринни франциялик Леоне Перолт, учинчи ўринни эса Люксембург вакиласи Жанни Леҳар эгаллади.
Эркаклар баҳсида эса 52 нафар атлет ўзаро беллашди. Унда португалиялик Васко Вилажа юқори спорт формасида эканини намойиш этиб биринчи ўринни эгаллади. Иккинчи ўрин Германия вакили Генри Графга насиб этган бўлса, учинчи ўринни канадалик Чарлез Пакет қўлга киритди.
Юртимиз вакили Жереми Куиндос мусобақани 17-ўринда якунлади.
Мусобақа ғолиб ва совриндорларини Жаҳон триатлон ташкилоти президенти Антонио Аримани ҳамда Ўзбекистон триатлон федерацияси раҳбари Виктор Маҳмудов тақдирлади.
Эртага, 26 апрель куни паратриатлон бўйича жаҳон кубоги (World Triathlon Para Cup) ўтказилади. Унда иштирокчилар ўз тоифаси бўйича баҳсларга киришиб, 750 метрга сузиш, 19 километрга велопойга ва 5 километрга югуриш бўйича ўз имкониятларини синовдан ўтказади.
Ғ.Ҳасанов, А.Исроилов (сурат), ЎзА
