АҚШ ва Россия президентлари иштирокида Будапештда ўтказилиши кутилаётган саммит номаълум муддатга кечиктирилгани маълум бўлди. Қўшма Штатлар етакчиси Дональд Трамп Владимир Путин билан «беҳуда учрашув» ўтказишни хоҳламаслигини айтди. Унинг сўзларига кўра, бу масала бўйича қарор икки кун ичида қабул қилинади. РФ Ташқи ишлар вазирлиги эса шундай бўлсада саммитга тайёргарлик давом этаётганини билдирган.
Журналистлар Трампдан Путин билан учрашувни кечиктиришга сабаб нима эканлигини сўрашди. АҚШ раҳбари шундай жавоб берди:
– Мен учрашувнинг самарасиз бўлишини ва вақтимни беҳуда сарфлашни истамайман, -деди у. – Шунинг учун бироз кутамиз.
Трамп Москва ва Киевга жанговор ҳаракатларни тўхтатиш ва мавжуд фронт чизиқларини сақлаб қолишни таклиф этганини эслатди.
Ундан Путин билан телефон орқали суҳбатдан сўнг фикри нима учун ўзгаргани ва нега Будапештдаги саммитни вақтини беҳуда кетказиш деб ҳисоблаётгани ҳақида аниқроқ сўралганда, Трамп барибир саволларга қониқарли жавоб бермаган.
– Нималар бўлишини ҳеч қачон олдиндан билмаймиз. Вазият тез ўзгармоқда, менимча, келаси икки кун ичида нималар режалаштираётганимизни маълум қиламиз, — деган у.
Сешанба куни Оқ уйнинг юқори лавозимли вакили журналистларга Трамп Путин билан яқин орада учрашиш режаси йўқлигини маълум қилди. Бу маълумот АҚШ давлат котиби Марко Рубио ва Россия ташқи ишлар вазири Сергей Лавровнинг телефон мулоқотидан кейин пайдо бўлди. Бу суҳбат учрашувга тайёргарлик жараёнига ёмон таъсир қилган бўлиши мумкин.
Эсласангиз, Россия президенти матбуот котиби Дмитрий Песков Путин ва Трамп учрашуви икки ҳафта ичида ёки ундан бироз кейинроқ бўлиб ўтиши мумкин, деб айтган эди. Трамп ҳам 16 октябрда Путин билан телефон суҳбатидан сўнг шундай деган эди. Бироқ вазият ўзгарди.
“Reuters” манбасига кўра, айрим европалик дипломатлар АҚШ саммитдан бутунлай воз кечиши мумкин, деб ҳисоблашмоқда. Бунга сабаб қилиб Россиянинг қатъий позицияси кўрсатилмоқда.
Учрашув олдидан россияликлар жуда кўп нарса талаб қилишди ва америкаликлар учун Будапештда Трамп учун фойда берадиган келишув бўлмаслиги аён бўлган. Шунга қарамай, Будапештдаги учрашувдан расман воз кечилмаган ва саммитни Венгрияда ўтказиш уринишлари «эҳтимол, давом этмоқда», дея ёзмоқда “Reuters”.
<iframe width="650" height="420" src="https://www.youtube.com/embed/JlftzEWNfFk" title="Tramp Putin bilan samarasiz uchrashuvni xohlamaydi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>К.Бекжонов, ЎзА