Трамп Италия Бош вазирини танқид қилди
АҚШ Президенти Дональд Трамп Италия Бош вазири Жоржа Мелонини Эронга нисбатан тутган позицияси учун кескин танқид қилди.
Маълум қилинишича, Трамп Италия ҳукуматининг Эрон билан боғлиқ можарога аралашмаслик ёндашувини танқид қилиб, бундай қарашни “қабул қилиб бўлмайдиган” деб атаган. Унинг фикрича, Рим ушбу жараёнда фаол иштирок этмаслиги хавфсизлик нуқтаи назаридан салбий оқибатларга олиб келиши мумкин.
Италия етакчиси аввалроқ мамлакатнинг ҳарбий можарога тортилишига қарши эканини билдирган ва миллий манфаатдан келиб чиқиб, эҳтиёткор позиция танланганини таъкидлаган.
Бинобарин, Италия ва АҚШ муносабати кескинлиги фақат Эрон масаласи билан чекланмайди. Аввалроқ Мелони Трампнинг Рим Папасига нисбатан танқидий фикрини “номақбул” дея баҳолаган эди.
Бу орада Америка раҳбари ўз чиқишларида Европа сиёсатига ҳам танқидий баҳо бериб, қитъадаги миграция ва энергетика сиёсати ички муаммони кучайтираётганига эътибор қаратган.
Кузатувчилар фикрича, бу икки қудратли давлат етакчилари ўртасидаги мазкур баҳс Ғарб мамлакатлари орасида ташқи сиёсат бўйича ёндашувда тафовутлар мавжудлигини яна бир бор намоён этди.
Д.Ҳакимов, ЎзА
