Трамп энергия нархлари ошишида Украинани айблади (+видео)
АҚШ президенти Дональд Трамп Украина Россиядаги дизель ёқилғиси ишлаб чиқариш корхоналарига ҳужум қилишни тўхтатиши кераклигини айтди. Унинг фикрича, бундай ҳужумлар дунёда дизель ёқилғиси танқислигига ва энергия нархларининг ошишига сабаб бўлмоқда. Бу ҳақда Euronews хабар қилди.
АҚШ президенти бу ҳақда Ирландияга икки кунлик ташрифи вақтида гапирди. Трамп шу тариқа энергия нархларининг тез кўтарилишида Украина ҳужумларини асосий сабаблардан бири сифатида кўрсатди. Аммо, айрим экспертлар энергия нархларининг ошишида асосий омил сифатида Трамп бошчилигида АҚШ ва Исроилнинг Эронга қарши олиб бораётган урушини кўрсатмоқда.
Трамп бу гапларни Ирландияга Очиқ гольф турнирида қатнашишга борганида айтди. У шунингдек Ирландия бош вазири Михол Мартин билан учрашди. Трамп Ирландия Республикаси ва Буюк Британия таркибидаги Шимолий Ирландиянинг ягона давлатга бирлашиши мумкинлиги ҳақида ҳам гапирди.
Буюк Британия бош вазири Энди Бёрнэм эса аввалроқ Ирландияни бирлаштириш бўйича референдум масаласи ҳозирча кун тартибидан олинганини айтган эди. Бош вазирга яқин манбалар шанба куни Трампнинг баёнотларидан кейин ҳам Британия ҳукуматининг позицияси ўзгармаганини билдирди.
1998 йилда тузилган «Яхши жума» тинчлик келишуви Шимолий Ирландияда 30 йилдан ортиқ давом этган қуролли можарога барҳам берган. Ушбу келишувга кўра, агар Шимолий Ирландия аҳолисининг кўпчилиги хоҳласа, Ирландияни бирлаштириш мумкин. Лекин, бундай референдумни Буюк Британия ҳукумати бошлаши керак.
Манбаларнинг Euronews'га маълум қилишича, Трампнинг Ирландияни бирлаштириш ҳақидаги чақириқлари АҚШ ва Буюк Британия ўртасида Эрон уруши сабаб кучайган кескинлик вазиятида янграган.
Кенжа Бекжонов, Улуғбек Тўхтаев, ЎзА
