Тоғ-кон саноатида илғор ғоялар ва ташаббуслар рағбатлантирилди
Пойтахтимиздаги “Заковат аренаси”да Тоғ-кон саноати ва геология вазирлиги тизимидаги саноат корхоналарида жорий этилган энг самарали рационализаторлик таклифлари танлови ғолибларини тақдирлаш маросими бўлиб ўтди.
Танловда иштирокчилар ишлаб чиқариш самарадорлигини оширишга қаратилган таклифлари, инновацион ёндашувлари ва янги ғоялари билан ўз иқтидори ҳамда касбий маҳоратини намоён этди.
Танлов якунларига кўра, "Навоий КМК" АЖ вакили "Йилнинг энг яхши рационализаторлик таклифи" номинациясида биринчи ўринни эгаллади. "Навоийуран" ДК вакили "Йилнинг энг яхши амалий таклифи" номинациясида иккинчи ўринга сазовор бўлди. "Олмалиқ КМК" АЖ вакили эса "Йилнинг энг яхши инновацион ёндашуви" номинациясида учинчи ўринни қўлга киритди. Шунингдек, "Ўзбеккўмир" АЖ вакили "Йилнинг энг ёш рационализатори" номинацияси ғолиби бўлди.
Тадбирда соҳа ривожига муносиб ҳисса қўшаётган мутахассислар билан бир қаторда, устоз ва мураббийларнинг меҳнати ҳам эътироф этилди. Хусусан, 1 октябрь - Ўқитувчи ва мураббийлар куни муносабати билан вазирлик тизимидаги тўртта олий таълим муассасасида кўп йиллардан буён самарали фаолият юритаётган, ёшларга чуқур билим ва тарбия беришда алоҳида жонбозлик кўрсатган устозларга ҳурмат-эҳтиром кўрсатилди.
Вазирлик ахборот хизматига кўра, тадбир якунида ишлаб чиқаришга янги ғояларни жорий этиш, илғор тажрибаларни оммалаштириш, ходимларнинг ташаббускорлигини қўллаб-қувватлаш ва ёш мутахассисларнинг касбий салоҳиятини ошириш муҳимлиги таъкидланди.
Н.Зиёдуллаева, ЎзА
