Теннис: Тимофеева ва Кудерметова жуфтлик чорак финалида
Хитойнинг Гуанчжоу шаҳрида теннис бўйича WTA 250 туркумига кирувчи "Guangzhou Open" турнирида Мария Тимофеева ҳамда Полина Кудерметова мамлакатимиз шарафини ҳимоя қилмоқда.
Ушбу тандем «Guangzhou Open» турнирининг жуфтлик баҳслари нимчорак финалида аргентиналик Николь Фосса Уэрго ва нейтрал теннисчи Елена Приданкинадан иборат дуэтни 6:1, 3:6, 10:6 ҳисобида мағлуб этди. Шу тариқа, чорак финалга чиққан Мария ва Полина энди ярим финал йўлланмаси учун япониялик Эри Хозуми ва словениялик Андрея Клепач жуфтлигига қарши кортга чиқади.
Маълмуот учун, мусобақанинг яккалик баҳсларида Мария Тимофеева илк босқичда сербиялик Теодора Костович устидан 6:4, 6:1 ҳисобида зафар қучди ва иккинчи даврада Сунь Синьжань (Хитой) билан куч синашадиган бўлди.
Жавоҳир Тошхўжаев,
ЎзА
