Ҳуқуқий муносабат
Талабалар тўлов-контракт олиш мақсадида kontrakt.edu.uz сайти орқали онлайн ариза бераётганда "Шартнома турини танлаш" деган бандга дуч келишади. Бу бўлимда талабалар икки ёки уч томонлама шартномани танлашлари сўралмоқда.
Талабалар бу борада қайси шартномани танлаши керак бўлади?
Тошкент давлат юридик университети Юридик клиника услубчиси Айгерим Арипбаева бу ҳақда қуйидагиларни маълум қилди.
–Сайтда жойланган икки томонлама шартнома — бу олий таълим муассасаси (ОТМ) ва талаба ўртасида тузиладиган шартнома ҳисобланади.
Агар талаба контракт тўловини ўзининг шахсий маблағидан амалга оширса, бу турдаги шартномани танлаш керак бўлади. Шунингдек, банкдан таълим кредити олмоқчи бўлса ёки ота-онасининг ойлик маошидан тўлов амалга оширилса бу шартнома танланади.
Уч томонлама шартнома эса бу ОТМ, талаба ва яна бирор ҳомий ташкилот ўртасида тузилади. Бу турдаги шартнома ҳомий ташкилот, жумладан, корхона ёки фонд талабанинг контракт тўловини қоплаётган бўлса, шунингдек, кейинчалик ўша ташкилотга ишлаш шарти бўлса уч томонлама шартнома танланади. Ҳомий ташкилотнинг СТИР рақамлари киритилиши талаб қилинади.
Шартнома турини тўғри танлаш, ариза жараёнини тезлаштириш ва келажакдаги молиявий мажбуриятларни аниқ белгилаш учун муҳим.
Гулноза Бобоева, ЎзА