Тадбиркорлар мурожаатларининг 81 фоизи ижобий ҳал этилди
Ўзбекистон Республикаси Президентининг тадбиркорлар билан очиқ мулоқотини юқори савияда ташкил этиш бўйича белгиланган вазифалар ижросини таъминлаш мақсадида ташкил этилган “Очиқ мулоқот – 2026” Республика штаби доирасида тадбиркорлик субъектларининг муаммо ва таклифларини тезкор кўриб чиқиш ишлари изчил давом этмоқда.
Мазкур жараёнда Марказий банк бошчилигида давлат улуши мавжуд тўққизта тижорат банки фаол иштирок этиб, тадбиркорлар мурожаатларини қабул қилиш, уларни таҳлил қилиш ҳамда амалий ечимлар ишлаб чиқиш ишларини тизимли равишда амалга оширмоқда.
Маълум қилинишича, бугунги кунга қадар банклар кесимида жами 641 та мурожаат келиб тушган. Уларнинг 521 таси ижобий ҳал этилган бўлиб, бу 81 фоизлик ижро кўрсаткичини ташкил этади. Айни пайтда 120 та мурожаат белгиланган тартибда кўриб чиқилмоқда.
Статистик маълумотларга кўра, энг кўп мурожаатлар йирик давлат банклари ҳиссасига тўғри келмоқда. Хусусан, Миллий банкга 81 та, Бизнесни ривожлантириш банкига 79 та, Халқ банкига 78 та, Микрокредитбанкка 76 та ҳамда Агробанкка 75 та мурожаат келиб тушган. Бу эса тадбиркорларнинг айнан ушбу молия институтлари билан яқин ҳамкорлик қилаётганини кўрсатади.
Мурожаатларни ҳал этиш самарадорлиги бўйича ҳам қатор банклар юқори натижаларга эришган. Жумладан, Асакабанк, Инфин банк, Трастбанк, Азия Альянс банк ва Ориент Финанс банкда мурожаатлар ижроси 100 фоизни ташкил этган. Шунингдек, Ўзсаноатқурилишбанкда бу кўрсаткич 99 фоиз, Алоқабанкда 97 фоиз, Микрокредитбанкда эса 93 фоизни ташкил қилган.
Таҳлилларга кўра, Республика штабига келиб тушаётган мурожаатларнинг асосий қисми имтиёзли кредитлардан фойдаланиш тартиби, амалдаги кредитлар муддатини узайтириш, кредит шартларини қайта кўриб чиқиш ҳамда тадбиркорлик фаолиятини молиялаштириш билан боғлиқ масалаларга тўғри келмоқда. Бу эса тадбиркорлар учун молиявий ресурсларга кириш имкониятларини янада яхшилаш, кредитлаш шартларини такомиллаштириш ва тушунтириш ишларини кучайтириш долзарблигини кўрсатмоқда.
Мурожаатларни тезкор кўриб чиқиш ва жойида ҳал этиш механизмининг такомиллашиб бориши мамлакатда ишбилармонлик муҳитини янада яхшилашга хизмат қилади. Давлат органлари, Марказий банк ва тижорат банклари ўртасидаги мувофиқлаштирилган ҳамкорлик эса тадбиркорларнинг долзарб масалаларини қисқа муддатларда ҳал этиш имконини яратмоқда.
Шу тариқа, “Очиқ мулоқот – 2026” Республика штаби тадбиркорлар билан давлат идоралари ўртасидаги самарали мулоқотни таъминлашга хизмат қилмоқда.
Ш.Маматуропова, ЎзА
