Тадбиркор мурожаатига жойида ечим топилди
Давлат раҳбари ташаббуси билан тадбиркорлик субъектларини қўллаб-қувватлаш, ташқи иқтисодий фаолиятдаги тўсиқларни бартараф этиш ва божхона тартиб-таомилларини соддалаштиришга қаратилган ислоҳотлар амалиётда аниқ натижалар бермоқда. Бухоро вилояти божхона бошқармасида ташқи иқтисодий фаолият иштирокчилари билан ўтказилган очиқ мулоқотда ҳам бунинг амалий ифодаси намоён бўлди.
Учрашувда Божхона қўмитаси масъуллари, ҳудудий божхона органлари мутахассислари ҳамда тадбиркорлик субъектлари вакиллари иштирок этишди. Мулоқотда тадбиркорлар фаолиятида учраётган муаммолар, ташқи савдо операцияларини амалга оширишдаги мавжуд масалалар ва уларнинг ечимига қаратилган таклифлар муҳокама қилинди.
Таъкидланганидек, мамлакатимизда тадбиркорликни ривожлантириш, ишбилармонлик муҳитини яхшилаш ва ташқи иқтисодий алоқаларни кенгайтириш давлат сиёсатининг муҳим йўналишларидан бири ҳисобланади. Бу жараёнда божхона тизимининг вазифаси фақат товарларни назорат қилиш билан чекланмайди. Балки қонуний ташқи савдони қўллаб-қувватлаш, ортиқча бюрократик тўсиқларни қисқартириш ва тадбиркорнинг вақти ҳамда маблағини тежаш ҳам муҳим аҳамият касб этади.
Очиқ мулоқотда Ўзбекистон Республикаси Президентининг 2026 йил 27 августдаги “Давлат божхона хизмати органлари фаолиятини такомиллаштириш ва божхона маъмурчилигида замонавий ёндашувларни жорий этиш чора-тадбирлари тўғрисида”ги фармони ҳамда мазкур ҳужжат билан тасдиқланган “Янги Ўзбекистон божхонаси — 2030” стратегиясида белгиланган вазифалар хусусида ҳам сўз юритилди. Жумладан, ташқи иқтисодий фаолият иштирокчилари учун яратилаётган имкониятлар, божхона тартибларини такомиллаштириш ва хизматлар самарадорлигини ошириш масалаларига эътибор қаратилди.
Учрашувнинг амалий аҳамияти тадбиркорлар мурожаатларини кўриб чиқиш жараёнида янада яққол намоён бўлди. Хусусан, “Пўлат сув қурилиш монтаж” МЧЖ вакили Ш. Хазратов вилоятдаги мактабларни ҳаво алмашинуви ва кондиционерлаш тизимлари билан жиҳозлаш мақсадида олиб келинган товарларга нисбатан божхона тўловлари бўйича имтиёзларни қўллаш масаласида мурожаат қилди.
Мурожаат масъуллар иштирокида кўриб чиқилиб, тадбиркорга тегишли тушунтиришлар берилди ва масала жойида ҳал этилди. Натижада олиб келинган товарларга нисбатан 280,1 миллион сўмлик божхона тўловлари бўйича имтиёз қўлланилиб, улар “эркин муомалага чиқариш” божхона режимига расмийлаштирилди.
Ушбу натижа очиқ мулоқотнинг моҳиятини ифодалайди: тадбиркорнинг муаммосини эшитишнинг ўзи эмас, балки уни қонунчилик доирасида ҳал этиш ва аниқ амалий натижага эришиш муҳим. Айниқса, мактабларни замонавий ҳаво алмашинуви ва кондиционерлаш тизимлари билан таъминлашга қаратилган лойиҳада божхона имтиёзининг қўлланилиши тадбиркор учун молиявий енгиллик яратиш билан бирга, ижтимоий аҳамиятга эга ишларни амалга оширишга ҳам кўмак беради.
Мулоқот давомида билдирилган бошқа фикр ва таклифларни ўрганиш, мавжуд муаммоларга қонуний ечим топиш ҳамда тадбиркорлик субъектларига зарур амалий ёрдам кўрсатиш масалаларига ҳам алоҳида эътибор қаратилди.
Бундай учрашувлар божхона органлари ва ишбилармонлар ўртасидаги ҳамкорликни мустаҳкамлаш, муаммоларни эрта аниқлаш ва уларни тезкор ҳал этиш учун муҳим майдон вазифасини ўтайди. Энг муҳими, тадбиркорликни қўллаб-қувватлашга қаратилган ислоҳотларнинг самараси қабул қилинаётган қарорлар билангина эмас, балки уларнинг жойларда қандай ишлаётгани, фуқаро ва тадбиркор ҳаётида қандай ўзгаришлар яратаётгани билан ҳам белгиланади.
Зариф Комилов, ЎзА мухбири
