Suv yo‘li — rizq yo‘li
Jizzax viloyatining barcha shahar va tumanlarida, mahalla va qishloqlarida, korxona, tashkilot va xo‘jaliklarida, qo‘yingki har bir go‘shasida mamlakatimiz Mustaqilligining 35 yilligiga tayyorgarlik ko‘rish maqsadida e’lon qilingan “Dolzarb 40 kunlik”da obodlashtirish, tozalash, ko‘kalamzorlashtirish ishlari izchillik bilan olib borilmoqda.
Suv bor joyda hayot bor, mehnat bor, rizq bor. Suvga e’tibor bor joyda esa obodlikning ildizi mustahkamlanadi.
O‘zbekiston davlat mustaqilligining 35 yilligi “Yagona Vatan, yagona xalq bo‘lib, yangi hayot va kelajak yaratamiz!” degan ezgu g‘oya asosida keng nishonlanmoqda. Ayni shu ulug‘ sana arafasida yurtimizning turli hududlarida obodonlashtirish va bunyodkorlik ishlariga alohida e’tibor qaratilmoqda.
Jizzax viloyatida ham bu jarayonning o‘z manzarasi, o‘z mehnati, o‘z qahramonlari bor.
Viloyat — 12 ta tuman va Jizzax shahrini birlashtirgan katta mehnat maydoni. Undagi 304 ta mahallada hayotning minglab rishtalari bir-biriga tutashib ketgan. Bu mahallalardagi dalalar, bog‘lar, tomorqalar va fermer xo‘jaliklari uchun suv oddiy ne’mat emas — u mehnatning natijasi, dasturxonning barakasi, xonadonning daromadi bilan chambarchas bog‘liq.
Shu bois suv xo‘jaligi ob’ektlarini asrash, ularning atrofini ozoda tutish, inshootlarni tartibga keltirish — faqat tashqi ko‘rinish masalasi emas. Bu — suvga, mehnatga va inson rizqiga hurmat.
Bugun Jizzax bosh nasos stansiyasi va suv xo‘jaligi ob’ektlarida olib borilayotgan ishlar ana shu ma’no bilan uyg‘unlashmoqda. Hududlar chiqindilardan tozalanmoqda, daraxt va butalar parvarishlanmoqda, yashil maydonlarga fayz kiritilmoqda, inshootlarning tashqi qiyofasi tartibga keltirilmoqda.
Bir qarashda oddiydek tuyulgan bu yumushlar ortida esa katta ma’no bor. Chunki suv inshooti — dala bilan inson o‘rtasidagi ko‘rinmas rishta. Nasos stansiyasida harakatga kelgan bir agregatning sadosi uzoqdagi ekin maydonidagi umidni uyg‘otadi. Kanaldan oqqan suv esa dehqonning mehnatini hosilga ulaydi.
Shuning uchun ham suvchilarning bugungi mehnatida bayramga tayyorgarlikdan ko‘ra kengroq mazmun mujassam. Ular inshootlarni tozalayotganda yurtning bir burchagini tartibga keltirayotir. Daraxtlarga shakl berayotganda — muhitga yashil jilo qo‘shayotir. Suv yo‘llari atrofini obod qilayotganda esa — ertangi hosil, ertangi rizq va ertangi kun haqida o‘ylayotir.
– Mamlakatimiz Mustaqilligining 35 yilligi munosabati bilan Jizzax viloyati suv xo‘jaligi ob’ektlarida keng ko‘lamli obodonlashtirish ishlari tashkil etilgan, – dedi Jizzax bosh nasos stansiyasi boshqarmasi boshlig‘ining o‘rinbosari Farhod Normatov. – Unda tizim xodimlari faol ishtirok etmoqda. Asosiy maqsadimiz suv xo‘jaligi ob’ektlarini toza, obod va sarishta holga keltirish, ulug‘ bayramni munosib kutib olish bilan birga, suv inshootlariga bo‘lgan mas’uliyat va e’tiborni yanada kuchaytirishdan iborat.
Darhaqiqat, “Dolzarb 40 kunlik”ning fayzi ham ana shunday mehnatda ko‘rinadi.
Mamlakat miqyosida e’lon qilingan mazkur jarayon hududlarni obod qilish, aholi uchun qulay muhit yaratish, mavjud muammolarni manzilli hal etishga qaratilgan.
Jizzaxda esa bu harakat suv inshootlari bo‘ylab o‘zgacha bir ma’no kasb etmoqda. Chunki suvchilar yaxshi biladi: suvning yo‘li toza bo‘lsa, uning qadri baland bo‘ladi. Inshoot sarishta bo‘lsa, unga bo‘lgan mas’uliyat ham ortadi. Atrof obod bo‘lsa, mehnatning o‘zi ham ko‘zga yanada yaqin, dilga yanada iliq ko‘rinadi.
Bugun nasos stansiyalari, kanallar va boshqa suv xo‘jaligi ob’ektlarida kechayotgan obodonlashtirish ishlari — bayram oldidan bajarilayotgan oddiy yumushlar emas. Ular Mustaqillikning 35 yilliga o‘ziga xos sovg‘adir.
Zero, Vatan obodligi ba’zan katta binolardan emas, bir ariq bo‘yini tozalashdan, bir daraxtni asrashdan, bir suv inshootiga e’tibor berishdan boshlanadi.
Ana shunday ezgu harakatlar esa Istiqlolning 35 yilligiga yana bir yorqin sahifa bo‘lib qo‘shiladi.
Abdujalol Qayumov, O‘zA muxbiri
