Сурхондарёда 90 нафар шахс Ўзбекистон фуқаролигига қабул қилинди
Президентимизнинг тегишли фармонига мувофиқ Мустақиллигимизнинг 35 йиллиги муносабати билан Ўзбекистон Республикаси фуқаролигига қабул қилинган бир гуруҳ ватандошларимиз сафида Сурхондарё вилоятида яшовчи 90 нафар фуқаролиги бўлмаган шахс ҳам бор.
Вилоят ҳокими Улуғбек Қосимов энг улуғ байрамимиз арафасида Ўзбекистон Республикаси фуқаролигини олган воҳадошларимизни табриклаб, уларга ID-карталарини тантанали топширди.
–Тожикистоннинг Шаҳритуз туманида туғилганман, – дейди Термиз шаҳридаги Жўйжангал маҳалласида яшайдиган Нисо Қурбоншоева.–Ёшим 63 да. Тақдир экан, Ўзбекистонга келин бўлиб тушдим. 31 йилдан буён Термизда яшайман. Бу кунни 31 йилдан буён орзиқииб кутдим. Қавму қариндошларни кўриш учун йўлга чиқиб, ҳужжатим бўлмагани сабабли чегарадан қайтиб келган кунларим ҳам бўлган. Қизимни шу ерга узатдим.Икки неварам бор. Шуларга боғланиб қолганман. Бугун Ўзбекистон фуқаролигини тасдиқловчи ҳужжатни қўлимга ушлаганимда хурсандчилигимдан дунёда худди қайта туғилгандек ҳис этдим, ўзимни. Тинч-тўкин яшаётганимиздан бахтиёрман. Ўзбекистонни чин Ватаним, деб биламан. Қизим ва икки неварамга ҳам Ватанга садоқатли бўлишни кўп насиҳат қиламан. Буларнинг барчаси учун ёшу кексанинг бошини бирдек силаётган меҳрибон Президентимизга раҳмат айтаман.
Тантанали тадбирда вилоят ИИБ бошлиғи Бахтиёр Иноқов ҳам янги Ўзбекистон фуқароларини ушбу унутилмас кун билан самимий муборакбод этди. Фуқаролик бу нафақат ҳуқуқий мақом, балки инсоннинг Ватан билан боғлиқлиги, унинг тақдири ва келажагига дахлдорлигини англатувчи юксак қадрият эканини алоҳида таъкидлади.
Ўзбекистон фуқаролигини олган шахслар номидан сўзга чиққанлар мамлакатимиз фуқароси сифатида янги ҳаёт босқичига қадам қўйгани юртимизда инсон қадри, унинг ҳуқуқ ва эркинликларига юксак эътибор қаратилаётганининг амалий ифодаси бўлгани ҳақида айтишди.
Холмўмин Маматрайимов,
ЎзА мухбири
0
Т
