Футбол бўйича Ўзбекистон Суперлигасининг сўнгги 26-тури якунланди. Тур якунларига кўра, мусобақа ғолиб ва совриндорлари аниқланди.

Бу йилги чемпионат ўзининг кутилмаган натижалари билан сўнгги турга қадар мухлислар эътиборида бўлди. Жумладан, «Металлург» кутилмаганда чемпион «Насаф» майдонида 1:2 ҳисобида ғалаба қозониб, 13-ўринга кўтарилди. «Нефтчи» билан ўз майдонида ўйнаган «Локомотив» эса 2:3 ҳисобида енгилиб, Про-лигага тушиб кетди.

ОКМК эса ўз майдонида «Қизилқум»ни 1:0 ҳисобида мағлуб этиб, ўз тарихида биринчи марта кумуш медални қўлга киритган бўлса, “Навбаҳор” сўнгги турда “Андижон” билан 3:3 ҳисобида дурангга имзо чекиб, бронза медалига сазовор бўлди. Бироқ, “Сўғдиёна” ва “Нефтчи” ҳам “Навбаҳор” каби 43 очко жамғарган бўлса-да, голлар нисбатига кўра 4-5 ўриндан жой олди.

Шунингдек, “Пахтакор” бу йилги мавсумни олтинчи поғонада якунлади. “Сурхон”, “Динамо”, “Андижон” ва “Бунёдкор” клублари кучли ўнликни якунлаб берган бўлса, “Қизилқум” ва “Олимпик” 11-12 ўриндан жой олди.

Энди ўтиш босқичида қолиш учун “Олимпик” клуби “Шўртан” билан, “Металлург” эса “Қўқон-1912” жамоаси билан рақобатлашади. Мазкур ўйинлар 4 декабрда бўлиб ўтади. Ушбу жуфтлик ғолиблари 9 декабрь куни Суперлига аъзосига айланиш учун ўзаро майдонга тушади.

Суперлиганинг бу йилги тўпурари «Пахтакор» ҳужумчиси Драган Черан бўлди. У мавсум давомида жами 13 та гол урди.

Жавоҳир Тошхўжаев, ЎзА