Спектаклларни болалар қалбига яқинлаштириш ниятидамиз

Сирдарё вилояти мусиқали драма театри қошида ташкил этилган қўғирчоқ театри ўзининг илк спектакли билан кичик томошабинлар учун янги саҳна оламини очди. “Аълочилик сири” қўғирчоқ спектаклининг премьераси болажонларга қувонч улашибгина қолмай, уларни эзгулик, билим ва яхши фазилатлар оламига етаклади.

Саҳнада жонланган қўғирчоқлар, томоша залида янграган болалар кулгиси ва эртак қаҳрамонларига тўла фойе... Сирдарё вилояти мусиқали драма театридаги илк премьера оддий спектаклдан кўра кўпроқ — болажонлар учун янги маданий масканнинг бошланиши бўлди.

Томоша бошланишидан аввал театр фоесида кичик меҳмонларни турли эртак қаҳрамонлари кутиб олди. Ранг-баранг образлар, қувноқ мусиқа ва байрамона муҳит болаларни бир зумда эртаклар оламига олиб кирди. Айрим болалар қаҳрамонлар билан суратга тушса, бошқалари улар билан суҳбатлашиб, саҳнадаги воқеаларни интиқлик билан кутди.

Сўнг жажжи томошабинлар томоша залига таклиф этилди. Саҳнада “Аълочилик сири” спектакли бошланиши билан болаларнинг диққати қаҳрамонларга қаратилди. Воқеалар ривожи, қўғирчоқларнинг ҳаракати, саҳна безаклари ва мусиқий ечимлар уйғунлиги кичик томошабинларни ўзига маҳкам боғлади.

Болажонлар қаҳрамонлар билан бирга кулдилар, уларнинг саргузаштларига шерик бўлдилар, айрим воқеаларни ҳайрат билан кузатдилар. Спектакль орқали билимга интилиш, тиришқоқлик, яхши хулқ ва эзгулик каби фазилатларнинг аҳамиятига эътибор қаратилди.

[gallery-30770]

— Қўғирчоқ театрини ташкил этишдан кўзланган асосий мақсадимиз болаларни санъат оламига эрта жалб этиш, уларда театрга меҳр уйғотиш ва мазмунли маданий муҳит яратишдан иборат. Бола учун театр шунчаки томоша эмас. Унинг тасаввури ва дунёқарашини бойитадиган, эзгулик ва гўзаллик ҳақидаги тушунчаларини шакллантирадиган ўзига хос тарбия мактаби ҳамдир.

“Аълочилик сири” билан илк қадамни ташладик. Энди репертуаримизни халқ эртаклари, миллий қадриятлар, замонавий болалар адабиёти ва тарбиявий мазмундаги асарлар билан бойитиб боришни режалаштиряпмиз. Болаларнинг ёши ва қизиқишларидан келиб чиқиб, турли мавзулардаги спектакллар тайёрлаймиз. Шунингдек, қўғирчоқ театри имкониятларидан фойдаланган ҳолда саҳнада янги ижодий ечимларни синаб кўрамиз.

Энг муҳими, спектаклларни болаларга яқинлаштириш ниятидамиз. Шу боис келгусида қўғирчоқ театри томошаларини вилоятнинг шаҳар ва туманларидаги мактабгача таълим ташкилотлари, умумтаълим мактаблари ва маданият масканларида ҳам намойиш этишни режалаштирганмиз. Ҳар бир спектакль болаларга яхши кайфият, янги таассурот ва эзгу фикр улашиши биз учун муҳим, — деди театр директори Дилмурод Тожибаев.

Сирдарё вилояти мусиқали драма театри жамоаси томонидан театр санъатини кенг тарғиб этиш ва томошабинлар қамровини ошириш борасидаги ишлар ҳам изчил давом этмоқда. 2026 йилнинг биринчи ярмида театр томонидан 124 марта спектакль намойиш этилиб, 38 минг нафардан ортиқ томошабин жалб қилинди. Томошалар театр биноси билан бир қаторда вилоятнинг шаҳар ва туманларида, таълим муассасалари ҳамда маданият масканларида ҳам ташкил этилди.

Айни пайтда театр репертуарини миллий ва замонавий саҳна асарлари билан бойитиш, ёш ижодкорларни қўллаб-қувватлаш, ижодий изланишларга кенг йўл очиш ва саҳна санъатини аҳолига янада яқинлаштиришга эътибор қаратилмоқда.

Қўғирчоқ театрининг фаолият бошлаши ана шу ижодий жараённинг янги йўналиши бўлди. Энди сирдарёлик болажонларни театр саҳнасида янги қаҳрамонлар, қизиқарли саргузаштлар ва эзгу ғояларга бой спектакллар кутиб туради.

“Аълочилик сири” билан бошланган илк қадамнинг ортидан яна кўплаб янги спектакллар саҳнага чиқиши кутилмоқда. Зеро, болаликда олинган ҳар бир яхши таассурот, саҳнада кўрилган ҳар бир қаҳрамон ва эшитилган ҳар бир эзгу фикр бола қалбида узоқ сақланади. Қўғирчоқ театри эса ана шу ёрқин таассуротларни болажонларга туҳфа этадиган янги маданий масканга айланмоқда.

Ғулом Примов, Умид Обиджонов (сурат) ЎзА