Тошкент вилояти Бўстонлиқ тумани Сижжак МФЙ ҳудудидаги Сижжаксойнинг Пискомсойга қўшилиш жойидан чапроқда қадимий ҳунармандлар маҳалласи аниқланди.

Март ойи охирида Чорвоқ сув омбори атрофида олиб борилган археология қидирув-кузатув ишлари чоғи ушбу захира масканига қўшиладиган Чотқолсойнинг чап соҳилидаги Қоровултепа ва Сижжаксойнинг чап қирғоғидаги Маслаҳаттепада тадқиқот ўтказилди.

Шунингдек, мутахассислар Сижжак МФЙ шимоли-шарқида, Пискомсойнинг ўнг соҳилида доирасимон шаклдаги қурилмалар изини аниқлашди. Шу атрофда сочилиб ётган темир тошқол, камон ўқи учи, сирланган ва сирсиз сопол идиш парчасига дуч келишди.

Шундан сўнг белгиланган икки жойда Ўзбекиситон миллий университети Археология йўналиши талабалари иштирокида қазиш ишлари олиб борилди. Натижада ҳозиргача сақланиб қолган доирасимон қурилма изи кулолчилик маҳсулотларини пиширишда фойдаланилган хумдонлар ўрни экани аён бўлди.

Икки дона хумдон очиб ўрганилган майдонда яна 15 дан зиёд айлана шаклидаги идиш, металл эритиш печи изи сақланган.

Сочилган сопол парчаларининг дастлабки таҳлили бу ҳудудда IX-XVIII асрлар оралиғида ҳунармандлар – кулол ва темирчилар устахоналари жойлашганидан гувоҳлик бермоқда. Келгусида тадқиқот давом эттирилиб, манзил янада чуқурроқ ўрганилади.

Дилмурод Нормуродов, ЎзМУ доценти