Навоий вилоятининг Нурота тумани Чуя қишлоғида истиқомат қилиб келаётган Рустам Худойқулов бир неча йилдирки ҳунармандчиликнинг ёғочсозлик йўналиши билан шуғулланиб келяпти. Бугунги кунда у ота-боболаридан мерос қилиб олган ҳунари билан элда ҳурмат қозонмоқда. Ҳунари орқасидан ўнлаб ёшларни иш билан таъминлаб, уларга “ёғоч билан тиллашиш” сирларини ўргатмоқда. Дарвоқе, у оиладаги 16 нафар фарзанднинг ўн биринчиси.

Отаси Тошқул бобо, бобоси Худойқул бобо ўз вақтида қўли гул уста бўлган. Айниқса, Худойқул бобо нафақат Нурота туманида, балки қўшни туманларда ҳам ном қозонган ҳунармандлардан бири саналган. Чуядаги эски мачит устунлари отахон томонидан ясалган. Тошқул бобо ҳам отасидан ёғоч билан ишлаш сирларини ўрганган. Рустамжон отаси ёнида юриб, ёғочга ишлов бериш сирларини ўрганди. 2006 йилда Россияга бориб, ёғочни қайта ишлаш заводларидан бирида ишлади. 

– 2016 йилда юртимизга қайтиб келдим ва мамлакатимизда тадбиркорлик фаолиятини янада ривожлантириш, бу фаолият турини янги босқичга олиб чиқиш, тадбиркорликни ҳар томонлама қўллаб-қувватлашга бўлган алоҳида эътиборни кўриб, ўз тадбиркорлигимни бошладим, – дейди Рустам Худойқулов. – Ишсиз ва касб-ҳунарга қизиқувчи ёшларни тўплаб, шогирдлар тайёрладим. Дастлаб, Тошкент вилоятининг Бўстонлиқ туманидаги санаторияларидан бирида дам олувчилар учун буюртма асосида ёғочдан 40 та кўчма дала уйлари қурдик. 

Рустам Худойқулов 2020 йилда “Нурота неогарден” масъулияти чекланган жамиятини ташкил этиб, фаолиятини янада кенгайтирди. У шогирдлари билан биргаликда биргина ўтган йилнинг ўзида Тошкент, Навоий ва Қашқадарё вилоятларининг сўлим масканларида 100 тага яқин барча қулайликлар ҳамда замонавий кўринишга эга кўчма дам олиш уйлари қуришди. Айни пайтда у қураётган қулай ва шинам кўчма ёғоч уйлари дам олиш масканларига ташриф буюрувчиларнинг севимли “уйча”ларига айланмоқда. Жорий йилнинг айни вақтига қадар эса 40 тага яқин енгил конструкцияли ёғоч уйлар қурилиб, юртимиз сайёҳлари фойдаланиши учун топширилди. 

Ёзда салқин, қишда иссиқ, барча қулайликларга эга бўлган бундай дала уйлари дам олувчиларга манзур келиб, талаб кун сайин ортмоқда. Айниқса, туризмни ривожлантириш мақсадида хизмат кўрсатишни йўлга қўяётган тадбиркорлар томонидан буюртмалар кўпаймоқда. 

– Бундай уйларни қуриш учун маҳсулотлар тўлиқ Россиянинг Екатеринбург шаҳридан келтирилади, – дейди тадбиркор. – Уйларнинг ҳажми ва дизайни буюртмачи талабидан келиб чиққан ҳолда турли кўринишга эга бўлади ва улар топширилишидан олдин ёнғинга қарши дориланиб, мижозга уйдан фойдаланиши учун керакли тавсиялар берилади. Битта уйни қуришга 10 кунга яқин вақт сарфланади. Цехимизда уй деталларга ажратилган ҳолда ясалиб, талаб қилинган ҳудудга махсус техникалар ёрдамида ўрнатилади. Ҳозирда Тошкент, Жиззах ва Қашқадарё вилоятлари, шунингдек, Тожикистон давлатида ҳам буюртма асосида ёғоч уйлар қуриш ишларини олиб бормоқдамиз.

Албатта, бу каби саъй-ҳаракатнинг барчаси юртимизда тадбиркорларга яратиб берилаётган кенг имкониятлар самарасидир. 

А.Бўриев, ЎзА мухбири