Шахмат: Жавоҳир Синдоров бугун Вишванатан Анандга қарши дона суради
Ҳиндистоннинг Бангалор шаҳрида Глобал шахмат лигаси тизимида жамоалар ўртасида “Tech Mahindra Global Chess League” турнири ўтказилмоқда. Турнирнинг илк турида ҳамюртимиз Жавоҳир Синдоров етакчилигидаги “FYERS American Gambits” жамоаси собиқ жаҳон чемпиони Вишванатан Ананд сардорлигидаги “PBG Alaskan Knights” жамоаси билан куч синашади.
Айтиш лозим, “FYERS American Gambits” таркибида Синдоров билан бирга Бибисара Ассаубаева, Нихал Сарин, Даниил Дубов, Сара Хадем ва жамоа бош менежери Марк'Андрия Мауриццини дона суради.
Умумий мукофот жамғармаси 1 миллион АҚШ долларидан иборат мазкур турнирда Магнус Карлсен сардорлигидаги "Alpine APL Pipers” жамоаси, Алиреза Фирузжа етакчилигидаги “Triveni Continental Kings” шахматчилари ҳам иштирок этади.
Эътиборли жиҳати, бугун ўтадиган дастлабки турда Жавоҳир Синдоров Вишванатан Анандга қарши кураш олиб боради.
Шунингдек, бугун мусобақа дастурига мувофиқ, Синдоров биринчи тахтада ҳаракатланадиган “FYERS American Gambits” жамоаси Алиреза Фирузжа сардорлигидаги “Triveni Continental Kings” билан ҳам баҳс ўтказади. Бу, нуфузли турнирнинг дастлабки кунида жаҳон шахмат ишқибозлари Синдоров ва Алиреза Фирузжа тўқнашувига гувоҳ бўлади, деганидир.
Айланма тизимдаги “Tech Mahindra Global Chess League” турнири 13 сентябрга қадар давом этади.
Т.Рўзиев, ЎзА
