Шахмат: Жаҳон чемпионатида Бекмуратов чемпионликка, Омонова совриндорликка эришди
Бирлашган Араб Амирликларининг Ал-Айн шаҳрида 20 ёшгача бўлган шахматчилар ўртасида ўтаётган жаҳон чемпионатининг рапид баҳслари якунида ҳамюртимиз Ҳумоюн Бекмуратов ғолибликни қўлга киритди.
Ўтказилган 9 та турдан иборат баҳсларда Ҳумоюн Бекмуратов 6 та ғалаба ва 3 та дуранг натижани қайд этди ва 7,5 очко жамғариб, 20 ёшгача бўлганлар орасида рапид йўналишида жаҳон чемпиони, деган шарафли номга эга чиқди.
50 га яқин мамлакатнинг 91 нафар энг маҳоратли шахматчи ёшлари иштирок этаётган дунё биринчилигининг рапид йўналишида Ўзбекистон терма жамоаси аъзоларидан Муҳаммадзоҳид Суяров 5 очко билан 22, 4,5 очко тўплаган Музаффаржон Абдурасулов 40, 4 очкога эгалик қилган Усмонхон Тоҳиржонов 53-ўриндан жой олди.
Рапид йўналишининг аёллар бўлимида Умида Омонова 6,5 очко билан қўшимча кўрсаткичлар эвазига кумуш медални қўлга киритган вазиятда истеъдодли шахматчи қизларимиздан Афруза Ҳамдамова 6,5 очко билан 5-ўринни, Нилуфархон Имомқўзиева 5 очко билан 16-поғонани банд этди.
Бугун, 5 ноябрь куни жаҳон чемпионатининг 13 та турдан иборат блиц ўйинлари бошланади.
Чемпионат дастурига биноан бугун кун давомида 9 та тур ўйинлари ўтказилса, эртага қолган 4 та тур ўйинлари натижасида мусобақанинг ғолиб ва совриндорлари аниқланади.
Тўлқин Рўзиев, ЎзА
