Шахмат: Европа кубогида Абдусатторов ва Ёқуббоевнинг жамоалари етакчи
Бугун кўҳна қитъа шахмат ишқибозлари Европа кубогининг 6-турида Абдусатторов-Ёқуббоев ўртасидаги ўйинга гувоҳ бўлишлари мумкин.
Черногориянинг Будва шаҳрида шахмат бўйича клублар ўртасида ўтаётган Европа кубогининг ортда қолган 5-тур ўйинларидан кейин Нодирбек Абдусатторовнинг “SuperChess Romania” ва Нодирбек Ёқуббоевнинг “Novy Bor Chess Club” жамоалари 10 очко билан пешқадамлик қилмоқда.
Кеча ўтказилган 5-тур мусобақасида “SuperChess Romania” шахматчилари Василий Иванчук етакчилигидаги “SK K CERO INVEST Nitra” жамоасини 5,5:0,5 ҳисобида мағлуб этди. Жамоалар қарама-қаршилигидаги баҳсда Абдусатторов ва Иванчук 1-тахтада куч синашди. Қизиқарли кечган ўйинда Нодирбек қора доналарда Иванчук билан муроса йўлини танлаган бўлса, Абдусатторовнинг жамоадошлари рақибларини таслим этди.
Мазкур турда Нодирбек Ёқуббоев дона сураётган “Novy Bor Chess Club” жамоаси Аржун Эригаиси етакчилигидаги “Alkaloid” вакиллари билан тўқнаш келди. Учрашувда “Novy Bor Chess Club” жамоаси 4:2 ҳисобида устунликка эришди. 1-тахтада Ёқуббоев қора доналарда Эригаиси билан дуранг ўйнаб, жамоасига муҳим очкони тақдим этди.
Бугун, 22 октябрь куни Европа кубогининг 6-тур мусобақасида “SuperChess Romania” жамоаси “Novy Bor Chess Club” билан рўбарў келиши ортидан нуфузли мусобақада шахмат ишқибозлари Будва шахмат майдонида Абдусатторов-Ёқуббоев “жанги”га гувоҳ бўлиши мумкин.
6-тур ўйинлари остонасида “SuperChess Romania” ва “Novy Bor Chess Club” жамоалари 10 очко билан 108 та жамоа орасида етакчилик қилаётган бўлса, Аниш Гири сардорлигидаги “Bayegan Pendik Chess Sports Club” ҳамда Пранеш етакчилигидаги “Tuxera Aquaprofit Nagykanizsai” жамоалари 9 очко билан кейинги поғоналарни банд этган.
Эслатиб ўтамиз, 7 та турдан иборат Европа кубогининг сўнгги тур ўйинлари эртага, 23 октябрь куни бўлиб ўтади.
Т. Рўзиев, ЎзА
