Мажбурий ижро бюроси Сариосиё туман бўлими бир йўла иш юритувидаги иккита алимент ундириш тўғрисидаги ижро ҳужжатини муддатидан олдин тамомлади.
Денов туманининг Гулобод маҳалласилик Хадича Бўронова Сариосиё туманида яшовчи собиқ турмуш ўртоғи билан оилавий келишмовчилик туфайли ота уйига қайтиб келади. Икки нафар вояга етмаган фарзанд онасига фуқаролик ишлари бўйича Сариосиё туманлараро судининг 2024 йилдаги ижро ҳужжати билан алимент ундириш белгиланган. Х.Бўранова жигаргўшаларининг яшаш шароитини яхшилаш учун собиқ турмуш ўртоғи билан ўзаро келишиб, 50 миллион сўм алимент пулини бир йўла олдиндан олди ва алиментдан воз кечди.
– Фуқаролик ишлари бўйича Сариосиё туманлараро судининг 2021 йилдаги алимент ундириш тўғрисидаги ижро ҳужжати ҳам муддатидан олдин якунланди, – дейди МИБ Сариосиё туман бўлими давлат ижрочиси Фурқат Убайдуллаев. – Алимент тўловчи ота Нодир Жангиров турмуш ўртоғи билан ўзаро келишган ҳолда фарзандининг моддий таъминоти учун 80 миллион сўм алимент тўловини нақд пулда тўлаб берди. Алимент ундириш ҳақидаги ижро ҳужжати ундирувчининг аризасига асосан иш юритувдан тамомланиб, ундирувчига қайтариб берилди. Бироқ, алимент пули ота-она ўрнини боса олмайди. Шу боис ҳам алимент тўловчи ота-оналардан арзимаган келишмовчиликлар сабабли жигаргўшаларидан ажралиб кетмасдан оиласини қайта тиклаш чораларини кўришни тавсия этамиз.
Холмўмин Маматрайимов, ЎзА мухбири