Россияда митингларда иштирок этган хорижликлар депортация қилинади (+видео)
АҚШ ва Хитой ўртасидаги Тайвань масаласи яна кескинлашмоқда. Россияда эса митингларда қатнашган хорижликларни депортация қилишни назарда тутувчи қонун лойиҳаси қабул қилинди. Куба ёнилғи захиралари тугаб қолгани сабаб оғир энергетика инқирозига юз тутмоқда.
“Тайвань сабаб АҚШ ва Хитой тўқнашиши мумкин” — Си Цзиньпин
Хитой раҳбари Си Цзиньпин АҚШ президенти Дональд Трамп билан Пекинда ўтган учрашувда Тайвань масаласида кескин баёнот берди. У Тайвань бўйича нотўғри сиёсат икки давлат ўртасида жиддий зиддият, ҳаттоки тўқнашувга олиб келиши мумкинлигини таъкидлади.
Музокараларда асосан иқтисодий ва савдо масалалари муҳокама қилинган бўлса-да, Си Цзиньпиннинг баёноти АҚШ–Хитой муносабатларини юмшатиш бўйича умидларга салбий таъсир кўрсатди. Дональд Трамп учрашувни “ажойиб” деб баҳолади, бироқ Тайвань мавзусига очиқ муносабат билдирмади.
Россияда митингларда иштирок этган хорижликлар депортация қилинади
Россия Давлат думаси хорижликлар ва фуқаролиги бўлмаган шахсларни депортация қилишни назарда тутувчи қонун лойиҳасини биринчи ўқишда қабул қилди.
Қонунга кўра, рухсат этилмаган митингларда қатнашган, Россия армиясини обрўсизлантирган ёки экстремистик фаолият билан боғлиқ ҳуқуқбузарлик содир этган хорижликлар мамлакатдан чиқариб юборилиши мумкин. Ҳужжатда депортация учун асос бўладиган ўнлаб янги ҳуқуқбузарликлар ҳам киритилган.
Саудия уруш пайтида Ироқдаги жангариларга зарбалар берган — Reuters
Reuters агентлиги хабарига кўра, Эрондаги уруш даврида Саудия Арабистони ҳарбийлари Ироқдаги Теҳрон қўллаб-қувватлайдиган шиа жангариларига зарбалар берган.
Маълумотларга кўра, ҳужумлар Саудия ва бошқа кўрфаз давлатларига дрон ҳамда ракета ҳужумлари уюштирилган объектларга қаратилган. Айрим зарбалар АҚШ ва Эрон ўртасидаги ўт очишни тўхтатиш келишуви арафасида амалга оширилган.
Кубада ёнилғи бутунлай тугади
Куба ҳукумати мамлакатда дизель, мазут ва хом нефть захиралари деярли қолмаганини маълум қилди. Оқибатда пойтахт Гаванада узоқ давом этаётган электр узилишлари кузатилмоқда.
Мамлакатнинг кўплаб ҳудудлари кунига 20 соатгача электрсиз қолаётгани айтилмоқда. Озиқ-овқат, ёнилғи ва дори-дармон тақчиллиги эса аҳоли норозилигини кучайтирмоқда. АҚШ санкциялари ва нефть нархларининг ошиши вазиятни янада мураккаблаштирган.
Латвия Россия ва Беларусь билан автобус қатновини бутунлай тақиқлайди
Латвия ҳукумати Россия ва Беларусь билан автобус қатновларини тўлиқ тўхтатишни назарда тутувчи қонун лойиҳасини тайёрлади.
Расмийлар қарорни миллий хавфсизлик билан изоҳлаб, Россия чегарасида йўловчилар махсус хизматлар томонидан босимга учраши мумкинлигини билдирган. Транспорт компаниялари эса янги чекловлар миллионлаб евро зарар келтиришидан огоҳлантирмоқда.
АҚШда аллигаторлар қуршовидаги мигрантлар қамоқхонаси бузиб ташланади
АҚШнинг Флорида штатидаги “Аллигатор Алкатрас” номи билан машҳур мигрантлар сақлаш маркази ёпилиб, бузиб ташланади.
Everglades ботқоқликлари ҳудудида қурилган марказ 5 минг кишига мўлжалланган бўлиб, у ерда мигрантлар оғир ва ғайриинсоний шароитларда сақланаётгани ҳақида кўплаб шикоятлар бўлган. Ҳозир марказдаги мигрантларни бошқа жойларга кўчириш ишлари бошланган.
<iframe width="650" height="420" src="https://www.youtube.com/embed/sD-WgCpZgYw" title="Netanyahuning BAAga maxfiy tashrifi tasdiqlanmadi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Нозимбек Мардонов, Салим Обиджонов ЎзА
