Ромеро Шаҳрам Ғиёсов билан жанг қилишдан бош тортса, чемпионлик камаридан маҳрум этиладими?
Профессионал бокснинг WBA йўналиши бўйича ярим ўрта вазн тоифасида амалдаги жаҳон чемпиони, америкалик Роландо Ромеро аслида ўз камарини ушбу вазнда мажбурий даъвогар бўлган ҳамюртимиз Шаҳрам Ғиёсов билан жанг олиб бориши керак.
Бироқ WBA ташкилоти Ромерога ўзбекистонлик мажбурий даъвогар Ғиёсов билан жангдан олдин Конор Беннга қарши ихтиёрий ҳимоя жангини ўтказишга рухсат берган.
Хўш, шундай шароитда ушбу қарама-қаршилик баҳси рўй бериши мумкинми?
ESPN нашри хабарига кўра, Беннинг ўзи Райан Гарсия ва Марио Барриос баҳси ғолиби билан профессионал бокснинг WBC йўналишида чемпионлик камари учун жанг қилиш истагида эканини билдирган.
Воқеалар ривожидан олдинга ўтиб айтадиган бўлсак, агар Роландо Ромеро-Конор Бенн жанги амалга ошмаса, унинг кейинги рақиби Шаҳрам Ғиёсов бўлиши талаб этилади.
Шундай вазиятда америкалик Ромеро ҳамюртимиз Шаҳрам Ғиёсов билан жанг қилишдан бош тортса, профессионал бокс қоидасига биноан чемпионлик камаридан маҳрум этилади.
Т.Рўзиев,
ЎзА