Қонунбузилишнинг оқибатини панжара ортида англашни кутмаслик керак
Кўчмас мулк, ер ажратиш ва ҳужжатлаштириш соҳалари узоқ йиллар давомида коррупциявий хавф-хатарлар энг юқори бўлган тизимлар қаторида тилга олинар эди. Чунки соҳадаги очиқликнинг етишмаслиги ва ортиқча бюрократия турли суиистеъмолчиликларга йўл очарди. Бироқ, бугун вазият тубдан ўзгармоқда. Соҳада коррупцияга қарши қатъий чоралар кўрилмоқда.
Хусусан, Кадастр агентлиги ва Давлат кадастрлари палатаси Тошкент шаҳар бошқармалари масъул ходимлари иштирокида Тошкент вилоятидаги 48-сон манзил-колониясида профилактик тадбир ташкил этилди. Унда иштирокчилар жазони ижро этиш муассасасидаги шароитлар, сақлаш камералари ва инфратузилма билан таништирилди.
Тадбирда қайд этилганидек, жиноятчилик, коррупция каби иллатларга қарши курашишда унинг ҳуқуқий оқибатларини аниқ ҳаётий мисолларда кўриш, уни яқиндан ҳис этиш кутилган натижага тезроқ эришишни таъминлайди.
Бундай учрашувлар давлат хизматчиларида коррупциявий ҳуқуқбузарликларнинг муқаррар ҳуқуқий ва ижтимоий оқибатлари ҳақида аниқ тасаввур ҳосил қилиш, хизмат вазифаларини ҳалоллик ва қонун устуворлиги тамойиллари асосида бажариш масъулиятини кучайтириш ҳамда коррупцияга нисбатан муросасиз муносабатни шакллантиришга қаратилган.
Коррупцияга қарши кураш – фақат ҳуқуқий талаб эмас, балки ҳар биримиз учун маънавий бурч. Чунки ҳалоллик – фарзандларимизнинг келажаги учун қўшган энг катта ҳиссамиз.
Ўтказилган тадбирнинг энг таъсирли ва эсда қоларли воқеаси бевосита маҳкумлар билан ўтказилган очиқ мулоқот бўлди. Унда ўйламай босган қадами, нотўғри қарори билан бугун қилмишидан надомат чекаётган кимсаларнинг аччиқ қисмати ва панжара ортида чиқарган хулосалари ҳеч кимни беэътибор қолдирмади.
–Давлат хизматчиси учун ҳалоллик — халқ ишончи ва юксак масъулият мезони, – деди Давлат кадастрлари палатаси Тошкент шаҳар бошқармаси Жамоатчилик билан алоқалар бўйича бош мутахассис Маҳмуджон Азимов. – Ҳар қандай вазиятда қонун ва виждонга таяниш, коррупциявий таклифларга қатъий рад жавобини бериш ҳар бир ходимнинг бурчидир. Бугун панжара ортида ўтган ҳаётини сарҳисоб қилаётган инсонларнинг пушаймони эртага бошқалар учун аччиқ сабоқ бўлиши керак. Зеро, «Сўнгги пушаймон — ўзингга душман» деган ҳикмат бежиз айтилмаган. Қилмиш содир этилгандан кейинги надомат йўқотилган эркинликни, синган ишончни ҳамда вақтни қайтариб бермайди.
Ҳеч бир манфаат эркинликдан, оила тинчлигидан ва ҳаловатдан устун эмас. Бир лаҳзалик нафс деб йиллар давомида асралган обрўни йўқотиш, бир оғиз ваъда ёки бир нотўғри қарор билан бутун ҳаётни хавф остига қўйишга арзимайди.
Ушбу профилактик ташрифдан кўзланган мақсад ҳам айнан шу: ҳар бир ходимни қилмишнинг оқибатини олдиндан англаш, ҳар қандай вазиятда қонун ва виждонга таяниш, коррупциявий таклифларга қатъий рад жавобини беришга ундашдир. Хатога йўл қўймаслик — энг тўғри қарор. Қонунбузилишнинг оқибатини панжара ортида англашни кутмаслик керак.
Гулноза Бобоева,
ЎзА
