Ҳар томонлама мукаммаллаштирилган қонунларнинг қабул қилиниши аҳолининг фаровонлигини ошириш, фуқароларнинг ҳуқуқ ва эркинликларини таъминлаш учун асос бўлади. Бунда фуқароларнинг жамоатчилик муҳокамалари жараёнидаги иштироки ва билдирган фикрлари, таклифларининг ҳам инобатга олиниши муҳим аҳамиятга эга.

Эндиликда қонун лойиҳаларини Қонунчилик палатасига киритишда унинг ҳуқуқий экспертизадан ўтказилган натижалари, коррупцияга қарши экспертизаси ва у бўйича ўтказилган жамоатчилик муҳокамаси натижаларини тақдим этиш талаби белгиланмоқда.  

Олий Мажлис Қонунчилик палатасининг мажлисида қонун лойиҳаларини Қонунчилик палатасининг муҳокамасига киритиш ва кўриб чиқиш тартибини такомиллаштиришга қаратилган қонун лойиҳаси иккинчи ўқишда кўриб чиқилди.  

Қайд этилганидек, юқоридагилар билан бирга, қонунчилик ташаббуси ҳуқуқи субъектига ўзи киритган қонун лойиҳаси иккинчи ўқишда қабул қилингунига қадар Қонунчилик палатасига таклиф киритиш орқали уни чақириб олиш ҳуқуқи берилмоқда.  

— Шунингдек, қонунларга идоравий норматив-ҳуқуқий ҳужжатлар нормаларини юқори юридик кучга эга бўлган қонун ҳужжатларига ўтказишни, аҳамияти ва долзарблигини йўқотган қонуности ҳужжатлари бекор қилинишини таъминлашга қаратилган қўшимчалар ҳам киритилмоқда, — деди депутат Дилдора Камолова. — Ушбу қонун лойиҳасининг қабул қилиниши қонунчилик ташаббуси ҳуқуқи субъектларининг қонун ижодкорлиги соҳасидаги фаолияти сифатини оширишга, фуқаролар, фуқаролик жамияти институтлари ва тадбиркорлик субъектлари вакилларини жамоатчилик муҳокамаларига кенгроқ жалб этишга, қонунларнинг ижтимоий муносабатларни тартибга солишдаги ролини мустаҳкамлашга хизмат қилади.  

Муҳтарама Комилова,

ЎзА