Президентимизнинг кичик ва ўрта бизнес вакиллари билан бўлиб ўтган учрашуви ҳақида Сенатнинг Бюджет ва иқтисодий масалалар қўмитаси раисининг ўринбосари Қабил Турсунов ўз фикрларини билдирди:

– Бу учрашув Янги Ўзбекистоннинг бизнес салоҳиятини юксалтиришда муҳим қадам бўлиб хизмат қилади. Кичик ва ўрта бизнесни ривожлантиришда уларга яратиб берилаётган имкониятлар, қулайликлар ўзининг яққол самарасини кўрсатмоқда. Агар охирги  беш йилликка назар ташлайдиган бўлсак, уларнинг  сони 2 карра  кўпайди ялпи ички маҳсулотдаги улуши 50 фоиздан,  саноатда ва экспортдаги улуши 30 фоиздан ошди. Соҳада меҳнат қилаётганларнинг сони  қарийб  11  миллионга етди.

Мамлакатимизда кичик ва ўрта бизнес, қўшилган қиймат яратишда, инвестиция жалб қилишда, аҳоли бандлигини таъминлашда, шунингдек, инновация, рақобат, ва экспортни кўпайтиришга энг катта туртки бераётган йўналишга, энг фаол соҳага айланиб улгурди.

Давлатимиз раҳбари тадбиркорликни қўллаб-қувватлаш – бу бизнинг стратегик йўлимиз эканлигини, кичик бизнесни қўллаб-қувватлаш бундан кейин ҳам давлат сиёсатининг устувор йўналишларидан бири бўлиб қолишини таъкидлаб,  2025 йил учун соҳадаги асосий мақсад ва вазифаларга тўхталиб ўтди.

Хусусан  кичик ва ўрта бизнеснинг иқтисодиётдаги улушини 55 фоизга кўтариб, 70 миллиард долларлик қўшилган қиймат яратиш; янги бозорларга кириб боришда кўмаклашиш, кичик бизнес экспортини 12 миллиард долларга олиб чиқиш; инфраструктура  маданият ва ижтимоий хизматларда уларнинг улушини 2-3 карра ошириш; соҳада банд аҳоли улушини 75 фоизга етказиш; жорий йилда эса 1,5 миллион доимий иш ўрнини  ташкил қилиш, 100 нафардан кўп ишчиси бор корхоналарни 4 мингтага олиб чиқиш; кичик бизнесда янги 100 та бренд маҳсулот чиқаришни йўлга қўйиш;  

кичик бизнес иштирокида 200 та стартап лойиҳаларни молиялаштириш каби соҳа учун янги ташаббусларни илгари сурди.

Шунингдек, кичик ва ўрта бизнесни ривожлантириш бўйича катта дастур ишлаб чиқилгани соҳага барча манбалар ҳисобидан 10 миллиард доллар ажратилгани, жумладан, аҳолининг тадбиркорлиги учун 22 триллион сўмлик имтиёзли ресурс ажратилгани, унинг 5 триллион сўми, бу демак,  2, 5 триллион сўми ёшларга ҳамда 2,5 триллион сўми аёллар тадбиркорлиги лойиҳалари учун йўналтирилиши, аёл тадбиркорларга кредит ставкаси бошқаларга нисбатан 2 фоиз арзон бўлиши  қайд этилди.  

Эндиликда бир йилда йириклашиб, кичик ёки ўрта корхонага айланган тадбиркорларга 300 миллион сўмлик кредитнинг 150 миллион сўми гаровсиз берилиши, худди шундай, оилавий тадбиркорлик бўйича ҳам 50 миллион сўмгача гаровсиз кредит берилиши юзасидан қонунчиликка ўзартириш киритилиши, шунингдек,  янги тадбиркорлар “оёққа туриб олиши” учун улар фаолият бошлаган биринчи йилда қўллаб-қувватлаш илк бор маъмурий ҳуқуқбузарлик қилган тадбиркор жавобгарликдан озод қилиниши, охирги уч йиллик айланмаси 10 миллиард сўмдан ошмаган, солиқдан қарзи бўлмаган корхонани ихтиёрий тугатишда текширув ўтказилмаслиги,  2028 йил 1 январга қадар кичик ва ўрта бизнесга қўшимча талаб ва мажбурият юклайдиган норматив ҳужжатлар қабул қилишга уч йиллик мораторий эълон қилиниши, солиқдан қарзини вақтида тўлай олмаган  фермерлар учун йиғилиб қолган пеняни ундиришдан воз кечилиши каби берилаётган енгилликлар хусусида батафсил тўхталди.

Президентимиз томонидан юқорида қайд этилган йўналишларда, хусусан,  кичик бизнес билан ишлашда маҳалладаги ҳоким ёрдамчилари, банклар, вилоят ҳокимлари, бандлик вазирлиги ҳамда Бош вазир ўринбосарларигача жуда катта тизим сафарбар қилингани таъкидланди.

Давлатимиз раҳбари ва кичик ва ўрта бизнес вакиллари билан бўлиб ўтган учрашуви қизғин ва самарали ўтди. Албатта, биз сенаторлар ҳудудий палата аъзолари ҳам соҳа вакилларини қўллаб қувватлаш борасида уларга яратиб берилаётган имкониятлардан тўлақонли фойдаланишларида, шунингдек, Кичик бизнес билан ишлашда масъул бўлган маҳалла, маҳаллий ҳокимлик, вазирлик, идора вакиллари билан бирга ишлаб уларга ҳар томонлама амалий ёрдам беришда кўмакчи бўламиз, уларни қўллаб қувватлаймиз.

<iframe width="640" height="420" src="https://www.youtube.com/embed/a4_h8XYYblw" title="Senatning Budjet va iqtisodiy masalalar qo‘mitasi raisining o‘rinbosari" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Н.Абдураимова, Ё.Мелибоев (видео), ЎзА