Қитъа чемпионатининг бугунги жангларида боксчиларимиз ғалабага эришди
Бугун, 2 апрель куни Мўғулистон пойтахти Улан-Баторда Asian Boxing ташкилоти томонидан 21 та давлатнинг энг маҳоратли боксчилари иштирокида ўтказилаётган Осиё чемпионатининг тўртинчи кунги жангларида Ўзбекистон терма жамоасининг 3 нафар аъзоси рингга кўтарилди.
Муросасиз жанглар натижасида ватанимиз шарафини ҳимоя қилган Абдуллоҳ Мадаминов -65 килограммда сингапурлик Каелан Кларкни, -80 килода Фазлиддин Эркинбоев қирғизистонлик Сағин Сатибалди Уулуни, +90 кило оғирликда Арман Маханов мўғулистонлик Бекнур Халини мағлубиятга учратди ва чорак финалга йўл олди.
Эртага қитъа чемпионатининг чорак финал жангларига старт берилади.
Унда юртимиз боксчиларидан Гулсевар Ғаниева -51 килограммда хитойлик Ю Вуга, -60 килода Муштарийбону Иброҳимжонова мўғулистонлик Намуун Монхорга, -55 килограммда Шаҳзод Музаффаров қозоғистонлик Маҳмуд Сабирханга қарши баҳс олиб боради.
Т.Рўзиев,
ЎзА
