“Президент олимпиадаси” иштирокчилари тантанали кутиб олинди
Янги Ўзбекистон спортининг янги чемпионларини тайёрлашга қаратилган “Президент олимпиадаси” спорт мусобақалари Республика финал босқичида иштирок этиш учун ҳудудий терма жамоаларнинг пойтахтимизга келиши давом этмоқда.
Бугун, 26 октябрь куни Ўзбекистон давлат жисмоний тарбия ва спорт университетида “Президент олимпиадаси”да иштирок этадиган Қорақалпоғистон Республикаси, Хоразм, Сурхондарё, Навоий, Қашқадарё ва Бухоро вилоятларидан келган ёш спортчилар тантанали кутиб олинди.
Кутиб олиш маросимида иштирок этган университет ректори Рашид Маткаримов, спорт фахрийлари, тажрибали мураббийлар “Президент олимпиадаси” мусобақалари мамлакатимиз миллий терма жамоаларига янги авлод вакилларини етиштириб беришда муҳим беллашув майдони эканини таъкидлади.
Байрамона тарзда ташкил этилган кутиб олиш маросимидан кейин ҳудудлардан келган ёш спортчилар барча шароитларга эга бўлган шинам меҳмонхоналарга жойлаштирилди.
“Президент олимпиадаси”нинг Республика финал босқичи мусобақалари 27 октябрь - 8 ноябрь кунлари 21 та спорт тури бўйича ўтказилади.
Ўзбекистон давлат жисмоний тарбия ва спорт университети мажмуаларида енгил атлетика, бокс ва қиличбозлик бўйича беллашувлар бўлиб ўтади.
Т.Рўзиев,
ЎзА
