Президент Әндіжанда жаңа инвестициялық жобаларды іске қосып, құрылысын бастап берді
Президент Шавкат Мирзиёев Әндіжан облысына сапары аясында жаңа инвестициялық жобаларды іске қосу және олардың құрылысын бастау рәсіміне қатысты.
Кейінгі жылдары өңірде кәсіпкерлік пен инвестиция үшін жасалып жатқан қолайлы жағдайлар өнеркәсіп салаларын дамытуға, жаңа өндірістік қуаттарды құруға және халықты жұмыспен қамтуға ықпал етуде.
Рәсімге жалпы құны 9 миллиард 400 миллион доллар болатын 206 жоба қамтылды. Оның ішінде құны 2 миллиард 50 миллион доллар болатын 98 жоба іске қосылса, жалпы құны 7 миллиард 350 миллион доллар болатын 108 жобаның құрылысы басталды.
Бұл жобалар энергетика, құрылыс, тоқыма, машина жасау, білім беру, туризм, логистика, фармацевтика және денсаулық сақтау сияқты маңызды салаларды қамтиды. Олар облыстың барлық 16 қаласы мен ауданында жүзеге асырылады.
Атап айтқанда, мақта-тоқыма кластері, электр энергиясын сақтау және тарату жүйесі, жиһаз жасау және былғары-аяқ киім өнеркәсібі аймақтары, электр автобустар, күн панельдері мен шағын су энергетикасына арналған жабдықтар өндіру, сондай-ақ заманауи білім беру және медициналық орталықтарды іске қосу жоспарланған.
Жаңа жобалар аясында заманауи тұрғын үй кешендері, халықаралық логистика және туризм орталықтары, су электр станциясы, қалдықтарды қайта өңдеу арқылы электр энергиясын өндіретін кәсіпорын, көлік құралдары мен жүк вагондарын өндіретін қуаттар құрылады.
Жобалар Қытай, Түркия, Оңтүстік Корея, АҚШ, Ресей, Беларусь, Германия, Үндістан, Біріккен Араб Әмірліктері және Тәжікстан компанияларымен, сондай-ақ жергілікті инвесторлармен бірлесіп жүзеге асырылып отыр.
Оларды іске асыру нәтижесінде 45 мыңнан астам жаңа жұмыс орны ашылып, жылына 60,6 триллион сум болатын өнім өндіру және 533 миллион доллар көлемінде экспорт жасау мүмкіндігі қалыптасады.
Рәсімге облыстың барлық қалалары мен аудандарынан жауапты тұлғалар, шетелдік серіктестер мен бастамашылар бейнеконференция арқылы қатысты. Олар жобалардың маңызы, жүзеге асырылу барысы және іске қосу мерзімдері туралы ақпарат берді.
Мемлекет басшысы аталған бастамаларды жүзеге асыруға қатысып жатқан шетелдік серіктестер мен жергілікті кәсіпкерлерге алғыс білдірді.
Президентіміз символикалық түймені басып, 98 жаңа жобаны іске қосты және 108 нысанның құрылысын бастап берді. Бұдан кейін инвесторлар мен өңір белсенділерімен кездесу өтті.
