Полина Кудерметова Истанбулдаги юришини муваффақиятли бошлади

Туркиянинг Истанбул шаҳрида WTA125 таснифига кирувчи халқаро турнирнинг биринчи давра баҳсларига старт берилди. Унда ҳамюртимиз Полина Кудерметова иккинчи босқич йўлланмасини қўлга киритди.

Аниқроғи, мукофот жамғармаси 115 минг АҚШ долларини ташкил этувчи ушбу турнирда Полина Кудерметова маҳоратли теннисчи туркиялик Чағла Буюкакчайга қарши кортга чиқди ва 6:3, 6:1 ҳисобида таслим этди. Энди у навбатдаги босқичда россиялик Анастасия Гасанова ва хитойлик Ханю Гао тўқнашуви ғолиби билан куч синашади.

Шунингдек, бугун мусобақанинг биринчи даврасида мамлакатимизниг учинчи рақамли теннисчиси Мария Тимофеева германиялик Нома Ноха Акугуэ билан иккинчи давра йўлланмаси учун рақобатлашади.

Дарвоқе, Полина ва Мария мазкур мусобақанинг жуфтлик беллашувларида биргаликда мамлакатимиз шарафини ҳимоя қилади. Улар биринчи даврада туркиялик теннисчилар Чағла Буюкакчай ва Айла Аксу дуэтини синовдан ўтказади.  

Жавоҳир Тошхўжаев,

ЎзА