Перуда кучли зилзила юз берди: қурбонлар бор
Перу марказида содир бўлган 5,1 магнитудали ер силкиниши оқибатида камида олти киши ҳаётдан кўз юмди.
Мамлакат бош вазири Луис Арройо Санчес “RPP” радиоси эфирида чиқиш қилиб, ҳалок бўлганларнинг оила аъзоларига ҳамдардлик билдирди ва ҳукумат табиий офатдан зарар кўрган ҳудудларда ўрганиш ишларини бошлаганини маълум қилди.
Унинг сўзларига кўра, зилзила оқибатида 250 дан зиёд турар жой биноси шикастланган, яна 48 та хонадон эса бутунлай вайрон бўлган. Ўлка Геофизика институтининг хабар беришича, ер силкиниши шанба куни оқшомда, Хунин департаментига қарашли Чупака шаҳридан 7 километр жанубда қайд этилган бўлиб, унинг ўчоғи 24 километр чуқурликда жойлашган.
Ф.Яхшибоева, ЎзА
