
Ikki oylik tanaffusdan so‘ng, qit’amiz futbol klublarining eng katta turnirlaridan biri bo‘lgan Osiyo Elit chempionlar ligasining navbatdagi turi start oldi. Aniqrog‘i, 2024-25 yilgi mavsumda yangicha formatda o‘tayotgan mazkur musobaqaning 7-turi doirasida dastlabki bahslar o‘tkazildi.
Unda “Al-Ayn” – “Al-Rayyan” 1:2, “Istiqlol” – “Al-Shorta” 1:1, “Al-Sadd” – “Al-Ahli” 1:3, “Al-Nasr” – “Al-Vasl” 4:0 hisoblari qayd etildi.
Mazkur natijalardan so‘ng “Al-Ahli” klubi ochkolarini 19 taga yetkazib olgan holda peshqadamga aylandi. “Al-Nasr” esa yirik g‘alaba evaziga ochkolar sonini 16 taga yetkazib, “Al-Hilol” jamoasiga yetib oldi. Shuningdek, “Al-Sadd” 12, “Al-Vasl” 10, “Al-Rayyan” 8, “Persepolis” va “Istiqlol” klublari 6 ochko jamg‘arib, kuchli 8 talikka yakun yasab berdi. “Paxtakor” va “Al-Garafa” hozirda 4 ochko bilan 9-10 o‘rinlarda borayotgan bo‘lsa, “Al-Shorta” 3, “Al-Ayn” esa 2 ochko bilan keyingi quyi o‘rinlarda qoldi.

Shuni ta’kidlab o‘tish lozimki, bugun, 4 fevral kuni liganing 7-turi doirasida “Al-Garafa” – “Paxtakor”, “Al-Hilol” – “Persepolis” klublari o‘zaro raqobatlashadi.
Ushbu uchrashuvlardagi qayd etilgan natijalardan so‘ng, yuqoridagi jadval biroz o‘zgarishi mumkin. Biz uchun ahamiyatlisi esa poytaxtimiz klubi “Paxtakor” safarda o‘tadigan “Al-Garafa”ga qarshi o‘yinda zafar quchsa, ochkolarini 7 taga yetkazgan holda “Al-Hilol” – “Persepolis” bahsi natijasidan qat’i nazar kuchli sakkiztalikka qo‘shiladi.

Endi esa “Al-Garafa” va “Paxtakor” klublariga oid ayrim faktlarni e’tiboringizga havola etamiz.
Bu jamoalar ilk bor 2002 yil OCHL musobaqasining 3-saralash raundida Dohada raqobatlashgan. Unda “Paxtakor” 3:4 hisobida mag‘lub bo‘lgan va Toshkentda raqibni 3:0 hisobida dog‘da qoldirgan. 2008 yil OCHL guruh bosqichida Qatarda 2:2 natijasi qayd etilgan. Toshkentda "Paxtakor" yana raqibdan kuchliroq ekanini isbotlagan holda 2:0 hisobida zafar quchgan.
Shuningdek, 2010 yil nimchorak finalda "Al-Garafa" 1:0 hisobida g‘alaba qozongan. 2018 yilgi musobaqaning pley-off bosqichida “sherlar” ustidan raqib jamoa 2:1 hisobida zafar quchgan.

“Paxtakor” shu kunga qadar Qatarning 6 klubi – “Al-Garafa”, "Al-Sadd", "Duhayl", “Qatar” SK, “Arabi” va " Al-Rayyan" jamoalariga qarshi jami 19 uchrashuvda maydonga tushgan va 5 tadan g‘alaba va durang hamda 9 mag‘lubiyat natija ko‘rsatgan.
Ma’lumot o‘rnida: Osiyo Elit chempionlar ligasining 7-turidan o‘rin olgan "Al-Garafa" va "Paxtakor" jamoalari o‘rtasidagi o‘yin Toshkent vaqti bilan soat 21:00 da boshlanadi. Qatarda bo‘lib o‘tadigan ushbu bellashuvda mezbonlar sariq rangli libosda harakat qilsa, toshkentliklar oq-ko‘k rangdagi futbolkalarda maydonga tushadi.
Javohir Toshxo‘jayev,
O‘zA