Пахта далаларида янги технологияларнинг ўрни беқиёс
Бугун даладаги меҳнатнинг самарадорлиги нафақат ер ва сув, балки замонавий техника, илғор технология ва инновацион ёндашув билан ҳам чамбарчас боғлиқ. Айниқса, пахтачиликда инсон меҳнатини енгиллаштириш, терим жараёнини қисқа муддатда ва сифатли ташкил этиш, мавжуд ресурслардан оқилона фойдаланиш давр талабига айланмоқда.
Давлат раҳбари ташаббуси билан қишлоқ хўжалигини замонавийлаштириш, тармоққа инновация ва рақамли технологияларни кенг жорий этиш, меҳнат унумдорлигини ошириш, фермер ва деҳқонлар учун қулай шарт-шароит яратишга алоҳида эътибор қаратилмоқда. Бу эса ерга муносабатдан тортиб, ҳосилни йиғиб-териб олишгача бўлган барча жараёнларни янги босқичга олиб чиқишни тақозо этмоқда.
Бухоро вилоятида ҳам ана шу эзгу мақсадлар изчил амалий ишлар билан уйғунлаштирилмоқда.
Шу мақсадда Бухоро вилояти ҳокими Ботир Зарипов “FM WORLD” компанияси Бош директори ZHU LIN JUN ҳамда компаниянинг Ўзбекистон бўйича сервис хизмати директори HUA YING JUN билан учрашди.
Мулоқотда вилоят қишлоқ хўжалиги соҳасини модернизация қилиш, замонавий техника ва инновацион технологияларни ишлаб чиқариш жараёнларига кенг татбиқ этиш, хусусан, пахта териш машиналарини харид қилиш масалалари юзасидан атрофлича фикр алмашилди.
Пахта терими — қишлоқ хўжалигида энг масъулиятли ва кўп меҳнат талаб қиладиган жараёнлардан бири. Шу боис уни замонавий техника ёрдамида механизациялаш нафақат иш жараёнини тезлаштиради, балки инсон меҳнатини енгиллаштириб, мавжуд имкониятлардан янада самарали фойдаланишга хизмат қилади.
Учрашувда замонавий пахта териш машиналаридан фойдаланиш орқали пахта йиғим-терими жараёнларини механизациялаш, меҳнат унумдорлигини ошириш, терим мавсумида техникалардан самарали ва оқилона фойдаланиш имкониятларини кенгайтириш масалалари муҳокама қилинди. Бу ерда гап оддий техника хариди ҳақида эмас, балки пахтачиликда меҳнат ва технология муносабатини янги босқичга олиб чиқиш ҳақида бормоқда. Зеро, бир вақтлар катта куч ва кўп вақт талаб қилган ишларни бугун замонавий машина бир неча баробар тезроқ ва тизимли амалга ошириши мумкин. Айниқса, терим мавсумида вақтнинг ҳар бир куни, ҳатто ҳар бир соати муҳим. Ҳосилни ўз вақтида йиғиб-териб олиш, далани қисқа муддатда бўшатиш ва кейинги агротехник тадбирларни кечиктирмасликда замонавий техниканинг ўрни беқиёс.
Мулоқот давомида таклиф этилаётган пахта териш машиналарининг техник хусусиятлари, уларнинг вилоят шароитида фойдаланиш имкониятлари, етказиб бериш жараёни, сервис хизмати кўрсатиш ва эҳтиёт қисмлар билан таъминлаш масалаларига ҳам алоҳида эътибор қаратилди. Бу жиҳат муҳим. Чунки замонавий техникани харид қилишнинг ўзи етарли эмас. Унинг узлуксиз ишлаши, малакали сервис хизмати, эҳтиёт қисмлар билан таъминланиши ва мавсум давомида самарали эксплуатация қилиниши ҳам катта аҳамиятга эга.
Шу нуқтаи назардан, компания ва вилоят мутасаддилари ўртасидаги музокаралар келгусидаги ҳамкорликнинг амалий асосларини белгилаб бериши билан аҳамиятлидир.
Бугун Бухоро далаларида замонавий техника кўпайиши — эртанги юқори унумдорлик, сифатли ҳосил ва қишлоқ хўжалигида янги меҳнат маданияти шаклланишининг муҳим омилидир.
Бухорода пахтачиликни механизациялаш жараёнини янада кучайтириш орқали бир қатор натижаларга эришиш мумкин. Жумладан, терим жараёнида инсон меҳнатига бўлган эҳтиёжни мақбуллаштириш, қисқа муддатда катта ҳажмдаги ҳосилни йиғиш, техникалардан мавсум давомида юқори самара билан фойдаланиш имкониятлари кенгаяди. Энг муҳими, бу жараён қишлоқ хўжалигини оддий меҳнатдан юқори технологияларга таянган замонавий ишлаб чиқариш тизимига айлантириш мақсадига хизмат қилади.
Давлат раҳбари томонидан илгари сурилаётган қишлоқ хўжалигини модернизация қилиш, ишлаб чиқаришга инновацияларни олиб кириш ва меҳнат унумдорлигини оширишга қаратилган ташаббусларнинг Бухоро вилоятида ана шундай амалий лойиҳалар билан бойиб бораётгани эътиборлидир.
Учрашув якунида томонлар вилоятда замонавий қишлоқ хўжалиги техникаларидан самарали фойдаланиш имкониятларини чуқур ўрганиш, пахта териш машиналарини харид қилиш бўйича ҳамкорликни давом эттириш ҳамда ушбу йўналишда аниқ чора-тадбирларни амалга оширишга келишиб олдилар.
Бугун замонавий пахта териш машинаси далага кириб келар экан, у билан бирга янги имкониятлар, янги технология ва янги тафаккур ҳам кириб келади. Чунки тараққиётнинг ҳақиқий мезони техника сонида эмас, балки унинг инсон меҳнатини енгиллаштириши, вақтни тежаши ва якуний натижани оширишида намоён бўлади.
Бухоро қишлоқ хўжалигида механизация ва инновацияга берилаётган эътибор эса соҳанинг келажаги учун муҳим қадамдир. Бугун музокара столида муҳокама қилинган замонавий пахта териш машиналари эртага Бухоро далаларида ҳаракатланиб, пахта терими жараёнида янги саҳифа очиши мумкин. Зеро, замонавий дала — замонавий техникадан, замонавий техника эса юксак натижадан бошланади.
Зариф Комилов, ЎзА мухбири
