Пара велоспортчиларимиз жаҳон чемпионатида янги тарих ёзди
Америка Қўшма Штатларининг Алабама штати, Хантсвилл шаҳрида шоссе йўналишида пара велоспорт бўйича навбатдаги чемпионати ўтказилди. Мусобақа миллий терма жамоамиз учун тарихий натижа билан якунланди.
Дунё биринчилигида 47 мамлакатдан 300 нафарга яқин спортчи иштирок этди. Унда Ўзбекистон терма жамоаси аъзолари 3 та олтин ва 1 та кумуш медалга сазовор бўлди. Жумладан, Т1 классида иштирок этган Маржона Пардабоева вақт учун пойга ва гуруҳ пойгасида барча рақибаларидан устун келиб, икки бора жаҳон чемпиони деган шарафли номга сазовор бўлди.
Чемпионатнинг H1 классида баҳс олиб борган Покиза Аҳмадбекова вақт учун пойгада олтин медални қўлга киритган бўлса, гуруҳ пойгасида кумуш медалга эга чиқди.
Шу тариқа, миллий терма жамоамиз пара велоспорт бўйича жаҳон чемпионатларидаги энг яхши натижасини қайд этди. Эътиборлиси, вакилларимиз мазкур мусобақада илк бор олтин медалларни қўлга киритди.
Эслатиб ўтамиз, миллий терма жамоамиз 2025 йил 28–31 август кунлари Бельгиянинг Ронсе шаҳрида ўтказилган жаҳон чемпионатида 4 та кумуш ва 1 та бронза медалини қўлга киритган эди.
Жавоҳир Тошхўжаев, ЎзА
