Өзбекстан мен Әзербайжан энергетикалық ынтымақтастықты кеңейту жөніндегі «Жол картасына» қол қойды
2026 жылғы 17 қыркүйекте Баку қаласында Өзбекстан Республикасының энергетика министрі Шерзод Худжаев пен Әзербайжан Республикасының энергетика министрі Парвиз Шахбазовтың кездесуі өтті.
Энергетика министрлігінің мәліметінше, кездесу барысында биыл тамыз айында екі ел президенттерінің кездесуінде белгіленген міндеттердің орындалуы, сондай-ақ энергетика саласындағы стратегиялық әріптестікті кеңейтудің перспективалары талқыланды. Тараптар жаңа жобаларды әзірлеу және жүзеге асыру, мұнай-газ бағытындағы ынтымақтастықты дамыту жөнінде пікір алмасты.
Сонымен қатар электр энергетикасы мен жаңартылатын энергия көздерін пайдалану, Орталық Азия – Әзербайжан «Жасыл энергия дәлізін» құру, геологиялық барлау жұмыстарын жүргізу, мұнай мен мұнай өнімдерін жеткізу, сондай-ақ мұнай өңдеу саласында бірлескен жобаларды жүзеге асыру мәселелеріне ерекше назар аударылды.
Кездесуде Президенттер Шавкат Мирзиёев пен Ильхам Әлиев арасындағы достық қарым-қатынас пен өзара сенімге негізделген диалог екі ел арасындағы стратегиялық серіктестікті нығайтуға ықпал етіп отырғаны атап өтілді. Бұл фактор энергетика саласындағы практикалық ынтымақтастықты одан әрі дамыту үшін де маңызды негіз болатыны айтылды.
Келіссөздер қорытындысында екі министрлік арасында 2026-2028 жылдары энергетика саласындағы ынтымақтастықты кеңейту жөніндегі «Жол картасына» қол қойылды.
Құжатта «Жасыл энергия дәлізі» жобасын жүзеге асыру, мұнай-газ саласында геологиялық барлау және өндіру жұмыстарын дамыту, мұнай мен мұнай өнімдерін жеткізу, мұнай өңдеу бойынша бірлескен жобаларды ілгерілету сияқты басым міндеттер белгіленген. Сонымен қатар Әзербайжанның «SOCAR» компаниясының Өзбекстандағы қызметін кеңейту де ынтымақтастықтың маңызды бағыттарының бірі ретінде айқындалды.
