Жорий йилнинг 20 июнь куни Санкт-Петербург халқаро иқтисодий форуми доирасида “Росатом” давлат корпорацияси ва “Ўзатом” агентлиги ўртасида муҳим стратегик битим имзоланди. Бу ҳақда агентлик ахборот хизмати хабар берди.

Келишув Ўзбекистонда катта қувватли атом электр станциясини барпо этиш имкониятларини ўрганишни кўзда тутади.

Ҳужжатга мувофиқ, икки томон иккита “ВВЭР-1000” реакторли энергоблок қуриш масаласини муҳокама қилди. Келгусида бу кўлам тўртта блоккача кенгайтирилиши мумкин. Лойиҳа Россияда ва хорижда ўзини оқлаган хавфсиз ва самарали технологияларга асосланади.

Имзолаш маросимида “Росатом” давлат корпорацияси  бош директори Алексей Лихачёв ва “Ўзатом” агентлиги директори Азим Аҳмедхўжаев иштирок этди.

Ҳужжат Россия Президенти Владимир Путиннинг 2024 йил 27 майдаги расмий ташрифи доирасида ҳамда  2025 йил 28 апрель куни Ўзбекистон Президенти Шавкат Мирзиёев билан ўтказилган музокаралар чоғида эришилган келишувларнинг мантиқий давоми бўлди.

Лихачёвнинг кўзларига кўра, Жиззах вилоятидаги кичик қувватли АЭС қурилиши билан бирга, " ВВЭР-1000" реакторли йирик миқёсли станция лойиҳаси орқали мамлакатда углеродсиз энергетика кластери яратилади. Бу инфратузилма нафақат электр таъминотидаги эҳтиёжларни қоплайди, балки Ўзбекистонда саноат ва инновацион соҳаларни ривожлантириш учун замин яратади.

Азим Аҳмедхўжаев таъкидлаганидек,  лойиҳани амалга оширишнинг техник ва иқтисодий асосларини ўрганиш учун қўшма Ишчи гуруҳ ташкил этилган. Ҳозирда биринчи энергоблок учун зарур реактор жиҳозларини ишлаб чиқариш бошланган.

Ишчи гуруҳ хулосалари асосида катта қувватли АЭС қурилиши бўйича якуний қарор қабул қилинади. Бу қарор лойиҳани амалий босқичга олиб чиқишда ҳал қилувчи аҳамиятга эга бўлади.

Н. Зиёдуллаева тайёрлади, ЎзА