Ўзбекистонда инфляция 7 фоизгача пасайди
Ўзбекистонда 2026 йил апрель ойи якунларига кўра инфляция даражаси яна пасайиш тенденциясини намоён этди.
Статистик маълумотларга кўра, йиллик инфляция 0,1 фоизга камайиб, 7 фоиз даражасида шаклланди. Бу эса сўнгги йиллар давомида қайд этилган энг паст кўрсаткичлардан бири сифатида баҳоланмоқда.
Апрель ойида ойлик инфляция 0,6 фоизни ташкил қилди. Нархлар ўсишига асосий босим озиқ-овқат маҳсулотлари ҳиссасига тўғри келган. Хусусан, гўшт маҳсулотлари нархининг ошиши умумий инфляция кўрсаткичига сезиларли таъсир кўрсатган.
Жумладан, бир ой давомида мол гўшти нархи ўртача 3,2 фоизга, қўй гўшти эса 3,7 фоизга қимматлаган. Шу билан бирга, айрим бошқа озиқ-овқат турларида ҳам мавсумий омиллар таъсирида нархлар ўзгариши кузатилган.
Қизиғи шундаки, Иқтисодиёт ва молия вазирлиги томонидан тақдим этилган маълумотларга кўра, айнан апрель ойида мол гўштининг улгуржи нархлари маълум даражада арзонлашган. Бу эса чакана бозордаги нархлар шаклланишига таъсир этувчи омиллар, жумладан логистика, воситачилик ва талаб-таклиф мувозанати каби жиҳатларни янада чуқур таҳлил қилиш зарурлигини кўрсатади.
Шу билан бирга, ноозиқ-овқат маҳсулотлари ва хизматлар соҳасида нархлар ўсиши нисбатан барқарор сақланиб қолмоқда. Айрим хизмат турларида тарифлар ўзгариши инфляцияга маълум даражада таъсир кўрсатган бўлса-да, умумий динамикада кескин ўзгариш кузатилмади.
Марказий банк томонидан белгиланган ўрта муддатли мақсадга кўра, инфляция даражасини 5 фоизгача тушириш режалаштирилган бўлиб, бу кўрсаткичга 2027 йилда эришиш кутилмоқда. Мутахассислар фикрича, қатъий пул-кредит сиёсати, бозор механизмларини такомиллаштириш ва таклиф ҳажмини ошириш орқали мазкур мақсадга босқичма-босқич етиб бориш мумкин.
Прогнозларга кўра, 2026 йил якунига қадар инфляция даражаси тахминан 6,5 фоиз атрофида шаклланиши кутилмоқда. Бу эса мамлакатда макроиқтисодий барқарорликни таъминлаш ва аҳоли даромадларининг реал қийматини сақлаб қолишда муҳим омил сифатида қаралмоқда.
Ш.Маматуропова, ЎзА
