Ўзбекистон-Япония ипакчилик соҳасида ҳамкорлик ривожланмоқда
Пойтахтимизда «O‘zbekipaksanoat» уюшмаси раиси Р. Абдуллаев Япониянинг «Trust Engineering Partners Co., Ltd.» компанияси катта маслаҳатчиси Такефуми Маюми ҳамда «Yachiyo Engineering Co., Ltd.» компанияси қурилиш ва харидларни бошқариш бўйича бош менежери Татсуя Кобаяши билан учрашув бўлиб ўтди.
Ўзбекистон ва Япония ўртасидаги ипакчилик соҳасидаги ҳамкорлик узоқ тарихга эга бўлиб, сўнгги йилларда янги стратегик ва технологик босқичга кўтарилди. Икки мамлакат ушбу соҳада хомашё етиштиришдан тортиб, юқори технологияларни жорий этиш ва тайёр маҳсулотларни экспорт қилишгача бўлган кенг кўламли лойиҳаларни амалга оширмоқда.
Учрашувда мамлакатимизда ипак ишлаб чиқариш ҳажмини ошириш, соҳада замонавий технологияларни жорий этиш ва Япония томони билан ушбу йўналишда ҳамкорлик қилиш масалалари муҳокама қилинди.
Қайд этилганидек, Япония томони Ўзбекистонда ипак ишлаб чиқариш ҳажмини оширишга қаратилган лойиҳани амалга ошириш имкониятларини кўриб чиқмоқда. Япония ҳукуматига таклиф сифатида тайёрланаётган лойиҳа доирасида замонавий ускуналарни етказиб бериш, ипак йигирув фабрикасини ташкил этиш, уларни ўрнатиш ҳамда мутахассисларни ўқитиш кўзда тутилмоқда.
Учрашув якунида томонлар мазкур йўналишда ҳамкорликни давом эттириш ва лойиҳа бўйича кейинги босқичларни биргаликда муҳокама қилишга келишиб олди.
Гулноза Бобоева,ЎзА
