Диёримиз жаҳон иқтисодий ҳамжамиятига чуқур интеграциялашиш йўлида муҳим қадам ташлади. Гап шундаки, яқинда Ўзбекистон ҳукумати ҳамда Иқтисодий ҳамкорлик ва ривожланиш ташкилоти – OECD ўртасида ўзаро англашув меморандуми имзоланди.

Таъкидланишича, ҳамкорлик инвестиция муҳитини ривожлантириш, рақамли трансформация, коррупцияга қарши кураш ва “яшил” энергетикани ўз ичига олган 19 та устувор йўналишни қамраб олади. 

Яна бир муҳим янгилик сифатида айтиш мумкинки, юртимиз шунингдек, OECDнинг Халқаро инвестициялар ва кўп миллатли корхоналар тўғрисидаги декларациясига қўшилиш учун ариза топширди. Бу дунё бўйлаб 50 дан ортиқ давлат томонидан тан олинган муҳим восита бўлиб, декларацияга қўшилиш халқаро инвесторлар ишончини оширади ва мамлакатнинг глобал инвестиция муҳити рейтингларидаги ўрнини яхшилайди.

Маълумот учун: Иқтисодий ҳамкорлик ва ривожланиш ташкилоти (OECD) давлат сиёсатида маълумотлар, таҳлиллар ва энг яхши амалиётларни тақдим этувчи форум ва билим марказидир. Бу марказ ҳаёт сифатини яхшилайдиган самаралироқ сиёсатларни шакллантиришга ёрдам бериш орқали кучлироқ ва адолатлироқ жамиятларни қуриш учун 100 дан ортиқ мамлакатлар билан ҳамкорлик қилади.

Таъкидлаш керакки, мазкур ҳамкорлик ўлкамиз фуқароларининг ҳаёт сифатига бевосита ижобий таъсир кўрсатади. Яъни, бу ҳамкорлик таълим ва соғлиқни сақлаш тизимларини яхшилаш, инвестиция оқимларининг ўсиши туфайли янги иш ўринларини яратиш, атроф-муҳитни муҳофаза қилиш ва қайта тикланадиган энергетикани ривожлантириш, меҳнат ҳуқуқлари ва ижтимоий ҳимояни мустаҳкамлашга хизмат қилади. 

Ўзбекистон инвестициялар, саноат ва савдо вазири ўринбосари Акрам Алиев бошчилигидаги мамлакатимиз делегациясининг Францияга ташрифи самарали бўлди.  Делегациянинг ютуқлари сифатида ОECD раҳбарияти билан ўтказилган ишчи учрашувларда республикамизнинг декларацияга қўшилишини тезлаштириш учун қўшма ишчи гуруҳ тузиш, OECD нинг масъулиятли бизнес юритиш бўйича Миллий алоқа марказини ташкил этишда кўмаклашиши, Ўзбекистон инвестиция сиёсатини кўриб чиқишнинг иккинчи босқичи доирасида ҳамкорлик, шу жумладан, замонавий инвестиция кодексини ишлаб чиқиш бўйича келишувларга эришилганини қайд этиш мумкин.

Экспертлар фикрича, ушбу ҳамкорлик Янги Ўзбекистоннинг барқарор ривожланиши ва энг юқори халқаро стандартлар асосида жаҳон иқтисодиётига интеграциялашуви учун янги уфқлар очади.

Гўзал Сатторова, ЎзА