Ўзбекистон ва Хитой тўқимачилик соҳасида рақамли ҳамкорликни кенгайтирмоқда
“Ўзтўқимачиликсаноат” уюшмаси ва Хитойнинг “Shaoxing Huangxi Intelligent Group” компанияси ўртасида тўқимачилик саноатида рақамлаштириш жараёнларини жадаллаштиришга қаратилган ҳамкорлик меморандуми имзоланди. Бу ҳақда уюшма ахборот хизмати маълум қилди.
Шу муносабат билан ўтказилган учрашувда томонлар ишлаб чиқариш жараёнларини автоматлаштириш, рақамли технологияларни жорий этиш ҳамда корхоналар самарадорлигини ошириш бўйича ҳамкорлик йўналишларини муҳокама қилди.
Меморандум доирасида тажриба алмашишни йўлга қўйиш, мутахассислар ўртасида маслаҳатлашувлар ўтказиш ҳамда қўшма пилот лойиҳаларни амалга ошириш режалаштирилган.
Мутахассислар қайд этганидек, ушбу ҳамкорлик Ўзбекистон тўқимачилик саноатини модернизация қилиш ва рақамли трансформация жараёнларини тезлаштиришда муҳим аҳамиятга эга.
Н.Зиёдуллаева, ЎзА
