Бугунги кунда мамлакатимизда қишлоқ хўжалигини ислоҳ қилиш ва бозор механизмларини жорий этиш бўйича кўламли ишлар амалга оширилди.

Бу эса, нафақат иқтисодиётнинг барқарорлигини таъминлаш ва аҳоли фаровонлигини оширишда қишлоқ хўжалиги тармоғининг ўрни ғоятда муҳим эканлигини, балки бевосита соҳада амалга ошириладиган ислоҳотларга ҳам боғлиқлигини кўрсатмоқда.

Биргина узумчиликда Давлатимиз раҳбари топшириғи асосида узумчилик тармоғини жадал ривожлантириш мақсадида алоҳида чора-тадбирлар режаси ишлаб чиқилиб, янги навлар яратиш, интенсив усулда узум етиштиришни кенгайтириш ҳамда бу борада ҳудудларнинг экспорт салоҳиятини ошириш ишларига киришилди.

Шунга кўра, “Qo‘shrabot Agro Star” МЧЖ билан ҳамкорликда академик М. Мирзаев номидаги Боғдорчилик, узумчилик ва виночилик илмий-тадқиқот институтининг Самарқанд ҳамда Чархин илмий-тажриба станцияларида Туркиянинг узум етиштирувчи ва экспорт қилувчи компаниялари вакиллари билан учрашув ташкил қилинди.

Мазкур тадбир давомида туркиялик мутахассислар ва институт олимлари ўртасида узум етиштириш, қуритиш ва экспорт қилиш бўйича тажриба алмашилди. Шунингдек, келгусида Ўзбекистонда майизбоп узум навларини етиштириш ҳамда экспорт салоҳиятини ошириш юзасидан муҳим ҳамкорлик йўналишлари белгилаб олинди.

Бу ҳамкорлик узумнинг жаҳон бозорида харидоргир бўлган янги, саноатбоп навларини кўпайтириш, соҳага илм-фан ютуқларини кенг жорий этишга янада туртки бўлади.

Гулноза Бобоева,ЎзА